Որտեղ գերիշխում է նյութապաշտությունը, այնտեղ երբեք ընկերություն և թիմ հասկացողություն գոյություն ունենալ չի կարող: Այսինքն` այդ մարդկանց քայլերը միշտ հիմնված են լինում իրենց անձնական, նյութական շահերի, փառքի վրա: Բնական է, որ ինչ-որ ժամանակ նրանց շահերը պետք է բախվեին. այս մասին այսօր լրագրողների հետ հանդիպմանը հայտարարեց «Սարդարապատ» շարժման նախաձեռնող խմբի ղեկավար Ժիրայր Սեֆիլյանը` բացատրելով Ռոբերտ Քոչարյանի և Սերժ Սարգսյանի միջև առկա հակասությունը:
Նրա խոսքով`ինքը համամիտ չէ, որ նրանք խաղ են անում, որովհետև այս տարբերակն է շրջանառվում մամուլում:
«Կգա ժամանակ, որ նրանք պատրաստ կլինեն մեկը մյուսի կոկորդը կրծել, քանի որ նրանց աստվածը նյութն է` Ոսկե հորթը»,- համոզված նշեց բանախոսը։
Ինչ վերաբերում է նրանց արտաքին քաղաքականությանը, ապա, ըստ Սեֆիլյանի, այդտեղ ոչ մի տարբերություն չկա: «Այսօր զավեշտալի է լսել քաղաքագետներին, ովքեր փորձում են առանձնացել Քոչարյանին` որպես Արցախի հարցով ավելի բարեհաջող արտաքին քաղաքականություն վարողի ` մոռանալով, որ Մադրիդյան սկզբունքները ստորագրվել են Քոչարյանի օրոք»,- նշեց նա` հավելելով, որ Սերժ Սարգսյանը շարունակում է Քոչարյանի սկսած գործընթացը Քի Ուեսթի օրվանից:
