ՀԱԿ համակարգող Լևոն Զուրաբյանը դիմելով ժողովրդին նշեց, որ ՀԱԿ շուրջօրյա հանրահավաքները քաղաքական դաշտում լարված մթնոլորտ են ստեղծել: Նա նկատեց, որ իրենք գիտեին, որ նման արձագանք լինելու է և այդ պատճառով առաջարկել են իշխանության հետ երկխոսության երեք խողովակներ:
Զուրաբյանը նշեց, որ այդ առաջարկն արվել է, որովհետև ՀԱԿ-ը գիտեր, որ սարսափած ընդդիմությունն անկանխատեսելի է:
Զուրաբյանը նշեց, որ ի պատասխան ՀԱԿ-ի՝ երկխոսության առաջարկի, իշխանությունները «հանճարեղ» գաղափար առաջարկեցին` շարունակել երկխոսությունն այն դեպքում, երբ ՀԱԿ-ը կդադարեցնի նստացույցերը. «Զարմանալի է տգիտության այդ չափը, որովհետև բանակցությունների իմաստը հենց սուր առճակատային վտանգներով հղի իրավիճակի կարգավորումն է, հենց այդ ժամանակ է պետք երկխոսությունը, այնինչ ասում են՝ երբ անցնի այդ վիճակը, նոր կերկխոսենք, աբսուրդ է»:
ՀԱԿ համակարգողը նշեց, որ նման հայտարարությամբ իշխանությունը ցույց է տալիս, որ դեռ ուժեղ են, որ ոչ ոք չմտածի, թե թույլ են ու բանակցությունների կգնան
միայն սարսափած. «Միայն թույլը կարող էր նման պատասխան տալ, իրական իշխանությունը միանգամից երկխոսություն կսկսեր բոլոր խողովակներով»:
Լևոն Զուրաբյանը հայտարարեց, որ հաշվի առնելով իշխանության նման դիրքորոշումը ՀԱԿ-ը պատրաստել է հայտարարություն` «մեր հերթական պատասխանը Չեմբեռլենին:
ՀԱԿ հայտարարությունում նշված էր, որ հաշվի առնելով իշխանության մերժողական կեցվածքը հավաքների ազատության իրացման նկատմամբ, մարզային հասարակական տրանսպորտի անօրինական արգելքը և ՀԱԿ-ի հասցեին հնչեցրած էժանագին հայտարարությունները՝ «ՀԱԿ-ը ներկա պահին այլևս անիմաստ է համարում նման իշխանության հետ որևէ երկխոսությունը և մեր առջև դրված խնդիրների լուծումը այսուհետև տեսնում ենք միայն ժողովրդի մոբիլիզացիայի և զանգվածային միջոցառումների ակտիվացման մեջ»:
Զուրաբյանը նշեց, որ միայն այն դեպքում է ՀԱԿ-ը պատրաստ երկխոսելու, եթե իշխանությունը համապատասխան կարգով դիմի ՀԱԿ-ին. «Մենք կքննարկեն և կորոշենք՝ ընդառաջել, թե ոչ»:
