Կառավարությունը նախօրեին հավանություն է տվել ՀՀ 2011թ. պետական բյուջեի նախագծի ցուցանիշներում փոփոխություններ կատարելու մասին արձանագրային որոշման նախագծին: Կատարված փոփոխությունների վերաբերյալ «Առաջին լրատվական»-ը զրուցել է ՀՀ ֆինանսների փոխնախարար Պավել Սաֆարյանի հետ:
Ըստ նրա` ՀՀ Ազգային ժողովի մշտական հանձնաժողովներում և լիագումար նիստում այդ հանձնաժողովների, պատգամավորական խմբերի, խմբակցությունների և անհատ պատգամավորների կողմից ներկայացված են եղել 612 առաջարկություններ, որոնցից ընդունվել է 212-ը (34.4%-ը): «Բոլոր առաջարկությունները չէ, որ վերաբերել են լրացուցիչ գումարների հատկացմանը, շատ առաջարկություններ պարզաբանման, հարցադրումների բնույթ ունեին, որոշներն էլ` վերաբաշխում էին ենթադրում: Բոլոր 616 առաջարկություններով նախատեսված լրացուցիչ ծախսերի ծավալը, եթե հաշվի չառնվեն նաև կրկնությունները, կազմում են 26.8 մլրդ դրամ: Այս 26.8 մլրդ դրամի ծախսերի հիմնական մասը վերաբերել է սոցիալ-մշակութային ոլորտին` 20.7 մլրդ դրամ, որից կրթությանը` 8.6 մլրդ դրամ, սոցիալական ապահովությանը` 10 մլրդ, մշակույթին` 0.7 մլրդ, առողջապահությանը` 0.7 մլրդ և գիտությանը` 0.8 մլրդ դրամ: Մնացածից 4.4 մլրդ դրամ տնտեսության ճյուղերում է առաջարկվել, այդ թվում` ջրային տնտեսության ոլորտում 0.5 մլրդ, տրանսպորտի և ճանապարհային տնտեսությունում` 1.1 մլրդ, գյուղատնտեսությունում` 2.6 մլրդ, բնակարանային տնտեսությունում` 100 մլն դրամ և մյուս ճյուղերում` ևս 100 մլն դրամ: Մյուս 1.7 մլրդ դրամն էլ վերաբերել է այլ ոլորտներին:
Կառավարությունը ամբողջությամբ կամ մասնակիորեն ընդունած 212 առաջարկություններից բացի, 71 առաջարկության վերաբերյալ համապատասխան պարզաբանումներ է տվել, իսկ 113 առաջարկություններ հնարավոր է համարել քննարկել առաջիկա տարիներին բյուջետային գործընթացի շրջանակներում: Այսինքն` ընդհանրապես հաշվի չեն առնվել 220 առաջարկություններ», – նշեց Պ.Սաֆարյանը: Ինչ վերաբերում է մակրոտնտեսական հիմնական ցուցանիշներին, ապա ըստ փոխնախարարի` դրանք ոչ մի փոփոխության չեն ենթարկվել: Դրանք են` Համախառն ներքին արդյունքի (ՀՆԱ) անվանական արժեքը, դրա աճի կանխատեսումը, ՀՆԱ-ի դեֆլյատորն ու բյուջեի դեֆիցիտը` ինչպես բացարձակ առումով (մնացել է 148.6 մլրդ դրամ), այնպես էլ ՀՆԱ-ի նկատմամբ (3.95%):
Բյուջեի հարկային եկամուտները ու տուրքերը ևս որևէ փոփոխության չեն ենթարկվել, սակայն եկամուտները ավելացել են մոտ 2.5 մլրդ դրամով` պայմանավորված փոխարժեքային տարբերություններով: Այսպես` օրենսդրությամբ նախատեսված է, որ կառավարությունը յուրաքանչյուր անգամ բյուջեն ներկայացնելիս հաշվարկների հիմքում պետք է ընդունի նախորդ ամսվա 1-ի դրությամբ ձևավորված դրամի փոխարժեքի միջին կուրսը: «Երբ մենք առաջին անգամ ներկայացրեցինք բյուջեն ԱԺ, դոլարի կուրսը 363 էր, եվրոն` 464: Նոյեմբերի 1-ին, դոլարի միջին կուրսը կազմել է 357 դրամ, իսկ եվրոյինը` 499 դրամ», – նշեց Պ.Սաֆարյանը: Եվ քանի որ կառավարությունը 2011-ի համար գրանտներ ստանալու է հիմնականում եվրոյով, իսկ եվրոն դրամի նկատմամբ արժևորվել է, ապա այդ վերահաշվարկի արդյունքում բյուջեի ավելացած եկամուտները (մոտ 2.5 մլրդ դրամ) պայմանավորվել են հենց այս հանգամանքով: Արդյունքում ճիշտ այդքան էլ ավելացվել են բյուջեի ընդհանուր ծախսերը` Նախկին տարբերակի 998.6 մլրդ դրամի փոխարեն կազմելով 1.1 տրլն դրամ: Մյուս կողմից` քանի որ դոլարը դրամի նկատմամբ արժեզրկվել է, արտաքին աղբյուրներից վարկերի սպասարկման ծախսերը կրճատվել են 1.8 մլրդ-ով: Փոխարժեքի տատանումների հետ կապված որոշ աննշան վերագնահատումներ էլ եղել են միջազգային կազմակերպություններին Հայաստանի անդամակցության անդամավճարների հետ կապված: Ինչ վերաբերում է նրան, թե ընդունված առաջարկություններով ի՞նչ գումարային փոփոխություններ են կատարվել բյուջեում և այս լրացուցիչ գումարները (փոխարժեքի վերահաշվարկի արդյունքում) ո՞ւր են ուղղվել, ապա Պ.Սաֆարյանը նշեց, որ ծախսերի ավելացում կատարվել է հիմնականում պաշտպանության ոլորտում` մոտ 5.6 մլրդ դրամով: «Պաշտպանության ոլորտի ծախսերի ավելացումը կատարվել է նախագահի հանձնարարականի հիման վրա, եղել է ՀՀԿ առաջարկը, և ես` որպես քաղաքացի, լրիվ կիսում եմ այդ կարծիքը, որովհետև մեր պաշտպանության ոլորտում նույնիսկ աշխատավարձի բարձրացում էլ նախատեսված չէր: Այս 5.5 մլրդը հնարավորություն կտա, որ 10%-ով աշխատավարձը բարձրացվի», – նշեց Պ.Սաֆարյանը: Մյուս էական փոփոխությունը վերաբերում է կրթության ոլորտին: Բայց այս դեպքում ծախսերը ոչ թե ավելացվել են, այլ վերաբաշխում է կատարվել` մոտ 1.9 մլրդ դրամի չափով` ընդունված առաջարկների հիման վրա: «Ընդունված մյուս առաջարկությունները ևս կատարվել են հիմնականում վերաբաշխումների հաշվին: Օրինակ` ոռոգման համակարգում լրացուցիչ օրենսդրական փոփոխություններով 500 մլն դրամ պակասել է, և այդ գումարը օգտագործվել է այլ առաջարկություններում: Կամ` կառավարությունը որոշում ընդունեց, որ ատեստավորում անցնող միջին որակավորում ունեցող ուսուցիչներին տրամադրվելու է հավելավճար: Շուրջ 716 մլն դրամ էլ նախատեսվեց սրա համար, բայց կրթությանը հատկացված այլ գումարների հաշվին», – նշեց Պ.Սաֆարյանը: