«Մեր երկրի առողջապահության համակարգ են թափանցել օլիգարխիան և կորպորակրատիան, որն էլ հանգեցրել է համակարգի բևեռացման: Կառավարման համակարգը և բժշկական բիզնեսը սերտաճել են. բիզնես շահեր հետապնդողը այսօր ղեկավարում է մեր երկրի առողջապահական համակարգը, իսկ օրենսդիր իշխանությունում հանձնաժողովի նախագահը ևս առողջապահական ոլորտում բիզնես շահեր ունեցող մարդ է, ովքեր հետապնդում են իրենց շահերը ի հաշիվ համակարգի»,- հայաստանյան առողջապահական համակարգի խնդիրներին անդրադառնալով՝ մեզ հետ զրույցում կարծիք հայտնեց առողջապահության նախկին նախարար, ՀԱԿ առողջապահության հանձնաժողովի ղեկավար Արարատ Մկրտչյանը:
ՀՀԿ-ի և ԲՀԿ-ի իրականացրած անվճար բուժօգնության ծրագիրն էլ, ըստ Մկրտչյանի, քաղաքական կոռուպցիայի կլասիկ ձև է. «Այդ գործընթացը խոսում է մոտալուտ արտահերթ ընտրությունների մասին, ֆալսստարտ չի սա, եթե սկսել են պետեկան ֆինանսական միջոցներով սնվող հիվանդանոցներից, սեփական հիվանդանոցներից մասնագետների ուղղարկել, այս կամ այն բուժհիմնարկում մնացած դեղամիջոցները տանել շրջաններ և բաժանել ժողովրդին, ապա խոսքը ամենևին էլ բարեգործության մասին չէ»:
Մկրտչյանի գնահատմամբ, այդ «բարեգործությամբ» նսեմացվում է մարզային առողջապահության դերն ու նշանակությունը. «Այն դեպքում, երբ այսօր մարզային առողջապահության զարգացման ծրագիր է իրականացվում համաշխարհային բանկի ֆինանսական միջոցների հաշվին և մոտավորապես 1-2 մլն դոլար հատակացումներ են կատարվում մարզային հիվանդանոցներին, այս գործելաոճը որևէ մեկնաբանություն չունի` no comment»: