Լրագրողների պաշտպանության կոմիտեն մտահոգված է ընդդիմության ակտիվիստ և «Հայկական Ժամանակ» անկախ օրաթերթի գլխավոր խմբագիր Նիկոլ Փաշինյանին ազատազրկման վայրում ծեծելու, այնուհետև մենախուց տեղափոխելու վերաբերյալ հաղորդումներով:
Երեքշաբթի օրը իշխանությունները Փաշինյանին տեղափոխեցին «Արթիկ» փակ ռեժիմի բանտ: Փաշինյանի պաշտպան Վահե Գրիգորյանը ԼՊԿ-ին տեղեկացրեց, որ այդ տեղափոխությունը հատուցումն էր այն բանի, որ Փաշինյանը շարունակում էր բանտից խմբագրականներ գրել և դրանք հրապարակել «Հայկական Ժամանակ» օրաթերթում: Ինչպես ԼՊԿ-ին հայտնեց Գրիգորյանը, Նիկոլ Փաշինյանը գրում էր Հայաստանի քրեակատարողական համակարգում ենթադրաբար առկա կոռուպցիոն երևույթների մասին:
Նախքան Արթիկ տեղափոխվելը Փաշինյանը 4 տարվա ազատազրկման իր պատիժը կրում էր Երևանի մոտ գտնվող Կոշ քրեակատարողական հիմնարկում` 2008 թ. փետրվարին Հայաստանում կայացած նախագահական խնդրահարույց ընտրություններից հետո զանգվածային անկարգությունների կազմակերպման մեղադրանքով (http://cpj.org/2008/03/restrictions-imposed-as-president-declares-emergen.php): Ըստ Գրիգորյանի, քրեակատարողական հիմնարկի ղեկավարները պարբերաբար Փաշինյանից պահանջել են հոդվածներ չգրել, սակայն նա շարունակել է գրել: Ինչպես հաղորդել է ԱՄՆ կառավարության կողմից ֆինանսավորվող «Ազատ Եվրոպա/Ազատություն» ռադիոկայանի հայկական ծառայությունը (http://rus.azatutyun.am/content/article/2217528.html), «Արթիկ» տեղափոխվելուց կարճ ժամանակ առաջ՝ նոյեմբերի 11-ին, Փաշինյանի տեղեկացմամբ, ինքը երկու դիմակավոր անձանց կողմից իր խցում ֆիզիկական հարձակման և ծեծի է ենթարկվել:
«Մենք մտահոգված ենք այն հաղորդումներով, որ Նիկոլ Փաշինյանը բռնությունների է ենթարկվել՝ ի հատուցում բանտային պայմանների վերաբերյալ իր քննադատական մեկնաբանությունների, և Հայաստանի իշխանություններին կոչ ենք անում այդ հարցի կապակցությամբ իրականացնել անկախ հետաքննություն»,- նշեց ԼՊԿ Եվրոպայի և Կենտրոնական Ասիայի ծրագրի համակարգող Նինա Օգնիանովան: «Մենք կոչ ենք անում Հայաստանի քրեակատարողական ծառայության պաշտոնյաներին՝ երաշխավորել Փաշինյանի անվտանգությունը և բարելավել բանտում նրա պահվելու պայմանները»:
Ըստ տեղական մամուլի հաղորդումների, բանտի ղեկավարությունը ժխտում է, որ հարձակումը տեղի է ունեցել, և նշում, որ բժշկական հետազոտությունը Փաշինյանի վրա չի հայտնաբերել ծեծի նշաններ: Անկախ քննություն չի իրականացվել: Ինչպես հաղորդում է նորությունների կովկասյան Kavkazsky Uzel անկախ կայքը, իշխանություններն այսօր հայտարարել են, որ Փաշինյանը տեղափոխվել է, քանի որ նա, ըստ հայտարարությունների, քանիցս խախտել է Կոշի գաղութի չգրված օրենքները, և քանի որ վիճել կամ կռվել է խցակիցների հետ:
Ըստ տեղական և միջազգային մամուլի հրապարակումների, իշխանությունները Փաշինյանին ձերբակալել են 2009-ի հուլիսին և 2010-ի հունվարին դատապարտել՝ 2008 թ. մարտին մայրաքաղաք Երևանում անկարգություններ կազմակերպելու մեղադրանքով: Յոթ մարդ մահացավ և ավելի քան հարյուրը վիրավորվեց այն բանից հետո, երբ ընդդիմության բողոքի ակցիաները՝ ընդդեմ նախագահական կեղծված ընտրությունների, վերածվեցին բռնությունների: Տեղական մամուլի հրապարակումների համաձայն, Փաշինյանը սկզբում դատապարտվել էր յոթ տարի ազատազրկման, հետագայում պատիժը նվազեցվեց մինչև չորս տարվա:
ԼՊԿ-ն Նյու Յորքում տեղակայված անկախ, շահույթ չհետապնդող կազմակերպություն է, որը գործում է հանուն աշխարհում մամուլի ազատության պաշտպանության: Հավելյալ տեղեկությունների համար այցելեք www.cpj.org: