Մոսկվայում ԱՊՀ գլխավոր շտաբերի պետերն այսօր ստորագրել են ԱՊՀ շրջանակներում ռազմական համագործակցությանը վերաբերող համաձայնագրերի նախագծային փաթեթը: РИА-Новости-ի գործակալության փոխանցմամբ, այս մասին հայտարել է ԱՊՀ պաշտպանության նախարարների խորհրդի մամուլի քարտուղար Միխայիլ Սևաստյանովը: Ավելի վաղ ՌԴ գլխավոր շտաբի պետ Նիկոլայ Մակարովը հայտարարել էր լրագրողներին, որ ԱՊՀ երկրների ղեկավարների առաջիկա գագաթնաժողովին կընդունվի մինչև 2015թ. ԱՊՀ ռազմական համագործակցության հայեցակարգը: Եվ բնականաբար, այդ նախագծային փաթեթն այսօր ընդունվել է գլխավոր շտաբի պետերի կեղմից: «Փաստաթղթերը ենթադրում են ԱՊՀ երկրների համատեղ կապի համակարգի և զինված ուժերի ավտոմատիզացման ռազմա-տեխնիկական ոլորտում համագործակցության շրջանակում»,- ասել է Սևաստյանովը: Նրա խոսքերով, գլխավոր շտաբների պետերը նաև քննարկել են ռադիացիոն, քիմիական և կենսաբանական իրավիճակի համատեղ վերահսկողության համակարգ ստեղծելու փաստաթղթերը, ինչպես նաև ռադիոլոկացիոն համակարգի կատարելագործման հարցերը:
Խորհրդի աշխատանքներին մասնակցել են Հայաստանի, Բելառուսի, Ադրբեջանի, Ղազախստանի, Ղրղզստանի, Ռուսաստանի, Տաջիկստանի, Թուրքմենիայի և Ուկրաինայի գլխավոր շտաբների պատվիրակությունները:
