ՄԱԿ-ի նոր անդամների ընդունման կոմիտեն այսօր կքննարկի Պաղեստինի անդամակցության մասին դիմումը: Դրական որոշման համար անհրաժեշտ կլինի Անվտանգության խորհրդի 15 անդամ երկրներից առնվազն 9-ի համաձայնությունը, սակայն միայն այն դեպքում, եթե ՄԱԿ ԱԽ մշտական 5 անդամներից ոչ մեկը վետո չկիրառի:
Ռուսական «Կոմերսանտն» այս կապակցությամբ նշում է, որ ԱՄՆ միանշանակ դեմ է լինելու Պաղեստինի միակողմանի անկախությանը և ՄԱԿ-ին լիիրավ անդամակցությանը: ՌԴ արտգործնախարար Սերգեյ Լավրովը հայտարարել է, որ ԱՄՆ-ը զգուշանում է վետո կիրառելու դեպքում իր դեմ լարել արաբական երկրներին, հետևաբար հնարավոր է, որ ամերիկացիները խափանեն Պաղեստինի անկախությունը «ուրիշի ձեռքերով»: Այդ պատճառով ԱՄՆ-ը այժմ ակտիվ աշխատանք է տանում ԱԽ-ի անդամ այն երկրների հետ, ովքեր դեռ չեն կողմնորոշվել, թե ինչպես են քվեարկելու:
Ավելի վաղ տեղեկացվում էր, որ ՄԱԿ ԱԽ անդամներ Նիգերիան, Գաբոնը և Բոսնիան դեռ չեն կողմնորոշվել, սակայն Պաղեստինի դիվանագիտական ակտիվ աշխատանքների շնորհիվ Նիգերիան և Գաբոնն այժմ կողմ են նրա անդամակցությանը:
Մասնագետները նշում են, որ Պաղեստինը ՄԱԿ-ին լիիրավ չի անդամակցի, սակայն կստանա դիտորդ-պետության կարգավիճակ, ինչի համար Պաղեստինը պետք է դիմի Գլխավոր ասամբլեային: Այստեղ ներկայացված 193 պետությունների քվեարկության պարագայում հնարավոր է՝ Պաղեստինը ստանա այդ կարգավիճակը:
Դիտորդ-պետության կարգավիճակով Պաղեստինը չի կարողանա քվեարկել ՄԱԿ-ում, սակայն հնարավորություն կստանա դիմել Միջազգային քրեական դատարան:
