The Financial Times-ի իր բլոգում հայտնի ֆինանսիստ և ներդնող Ջորջ Սորոսը գրել է, որ ֆինանսական շուկաները աշխարհը տանում են դեպի նոր «մեծ դեպրեսիայի» շրջան, իսկ իշխանությունները, հատկապես` եվրոպական երկրներում, կորցրել են իրավիճակի նկատմամբ վերահսկողությունը:
«Իշխանությունները պետք է նորից իրավիճակը վերցնեն իրենց վերահսկողության տակ, ընդ որում` անհապաղ»,- ասել է Սորոսը: Նա առաջարկել է դիմել երեք քայլի.
Ա. Եվրոգոտու երկրները պետք է սկզբունքային որոշում կայացնեն և ստեղծեն մեկ միասնական ֆինանսների նախարարություն,
Բ. Խոշոր բանկերի կառավարումը հանձնեն Եվրոպական կենտրոնական բանկին` դրա դիմաց ստանալով ժամանակավոր երաշխիքներ և պարբերաբար ավելացվող կապիտալիզացիա,
Գ. Եվրոպական կենտրոնական բանկին պետք է թույլ տա, օրինակ, որպեսզի Իտալիան և Իսպանիան վերաֆինանսավորեն իրենց պարտքերը ցածր տոկոսներով:
Նա ասել է, որ այս երեք քայլերից հետո ֆինանսական շուկաները կհանգստանան և նոր աճի հնարավորություն կտան: Սորոսը զգուշացրել է, որ չի կարելի թույլ տալ, որպեսզի Հունաստանի ֆինանսական ճգնաժամը փոխանցվի մյուս երկրներին: Նրա կարծիքով, այս պահին կա երկու խոցելի տեղ` բանկերը և պետական պարտատոմսերը, ինչպես Իսպանիայի և Իտալիայի դեպքում է: