«Եկեղեցին չի անում որևէ կոչ՝ իշխանությանն այս մեղավոր վիճակից հանելու համար»,- այսօր լրագրողների հետ հանդիպման ժամանակ նշեց ազգագրագետ Հրանուշ Խառատյանը՝ նարեկաբույժ, հոգեթերապևտ Արմեն Ներսիսյանի հետ՝ «Արժեքների կորստից մինչև սոցիալական աղետ» թեմայի շուրջ բանավեճի ընթացքում:
«Այժմ մարդկային արժեքների ձևափոխման խնդիր կա: Պետք է ասել, որ մեր ընդհանուր արժեքային համակարգը խաթարվել է, չկա այն հնարավորությունը, որի միջոցով մարդը դուրս գա ճգնաժամային վիճակից»,- ասաց ազգագրագետն` ընդգծելով, որ վերջին շրջանում ինքնասպանությունների մեծ մասը սոցիալական խնդիրների պատճառով է կատարվում: Նա նաև ասաց, որ հասարակական և քաղաքական ինստիտուտների թերացումների արդյունքում են շատանում ինքնասպանությունները:
Հոգեթերապևտ Արմեն Ներսիսյանն այս իրավիճակից դուրս գալու համար առաջարկեց նարեկաբուժությունը: «Նարեկացին ասում է, որ մարդը դարձել է անտարբեր և, որպես մարդ, արժեզրկվում, իջնում է ավելի բուսական մակարդակի, որը նրան կարող է մահացնել: Մարդը պետք է կուշտ լինի, հետո նոր խոսենք նրա այլ պահանջների մասին: Պետք է խոսքի կերակուր, խոսքի միջոցով է, որը մարդը կարող է վերակենդանանալ, նա միշտ պետք է ստանա բարություն, լավատեսություն, կենսուրախություն, հավատ դպրոցում, ընտանիքում, ֆիլմերով, այս անորակ ֆիլմերը մարդուն վատացնում են, ես առաջարկում եմ լուծում՝ նարեկաբուժությունը»,- մեկնաբանեց Ա. Ներսիսյանը:
Նրա կարծիքին հակադրվեց Հ. Խառատյանն՝ ասելով, որ այսօր Հայ առաքելական եկեղեցին ոչինչ չի անում այս մեղավոր վիճակից ժողովրդին հանելու համար: «Եթե հասարակության մեջ մեծ լարվածություն կա, եթե մարդ գիտի, որ չի կարողանալու իր ծրագրերի մի որոշ մասն իրականցնել, մարդն իր արժանապատվությամբ որևէ տեղ չունի, Նարեկը ոչինչ չի կարող անել, որովհետև անհատական դեպքերի համար է, բայց մենք ընդհանուր այս վիճակում ենք»,- վերլուծեց Հ. Խառատյանը` հավելելով, որ եկեղեցիների, որպես ինստիտուտների, դերն այլևս պետք չէ:
«Առաջինը՝ մեր մոտ սպանությունների և ինքնասպանությունների իրավական հետաքննություն չկա, մենք չունենք պատճառների վիճակագրություն, մնում է ենթադրություններ անել »,- եզրափակեց ազգագրագետը:
