«Առաջին Լրատվական»-ի խնդրանքին` մեկնաբանել վերջերս Wikileaks-ի կողմից հրապարակված փաստաթղթերում Հայաստանին վերաբերող նյութերը, արդյոք դրանք կազդե՞ն հայ-ամերիկյան հարաբերությունների, Ամերիկայի հայկական լոբբիստական կազմակերպությունների գործունեության վրա, ԱՄՆ Հայ դատի գրասենյակի ղեկավար Արամ Սուրեն Համբարյանը պատասխանել է. «…Որպես լոբբիստական կազմակերպություն, որը կոչ է անում մեր կառավարությանը գործել ճշմարտության, արդարության, ազատության և մարդու իրավունքների ամերիկյան որդեգրված արժեքներին համապատասխան, մենք ողջունում ենք մեր արտաքին քաղաքականության իրականացման ավելի մեծ թափանցիկությունը:
Ինչ վերաբերում է հայ-իրանական կապերի վերաբերյալ հաղորդագրությանը, որն ուղարկվել է 2008 թ. դեկտեմբերի 24-ին՝ ժամը 21:58 (Ծննդյան տոների նախօրեին)՝ Ջորջ Բուշի կառավարման վերջին օրերին, ապա սա ցույց է տալիս, որ պետքարտուղարությունը պարտավոր էր պարզել՝ Հայաստանի գործողությունները համապատասխանո՞ւմ էին օգնության և առևտրի հետ կապված պատժամիջոցների կիրառմանը: Հիմնվելով հասարակական քննության վրա՝ Հայաստանն արժանի չի եղել պատժամիջոցների կիրառման: Սա պարզ է: Սա արժանի է լրագրողական հետաքննության. ո՞վ է այս նյութերն ուղարկել դեկտեմբերյան ուշ գիշերին, երբ, անկասկած, պետքարտուղարության շենքը լիովին դատարկ էր, և դա՝ խնդրահարույց նախագահական շրջանի վերջին օրերին»։