Այսօր Московские новости թերթն անդրադարձել է ԱՊՀ տարածքում Պուտինի վերադարձի արձագանքներին: Թերթը մեջբերում է WikiLeaks կայքում հրապարակված՝ Ադրբեջանի նախագահ Իլհամ Ալիևի` ամերիկյան դիվանագետներին փակ հանդիպման ժամանակ ասած այն արտահայտությունը, թե «երկու արջերի՝ մեկ որջում ապրելն անհնար է»: ԱՊՀ առաջնորդներից ոչ ոք մինչև հիմա չի արձագանքել ռուսաստանյան տանդեմում այս փոփոխություններին:
Թերթը եզրակացնում է, որ, թերևս, միայն Սերժ Սարգսյանի համար Պուտինի վերադարձը կարող է ուրախալի փաստ լինել: Եվ սա միայն այն պատճառով չէ, որ Մեդվեդևի նախագահության տարիներին ղարաբաղյան հակամարտության կարգավորման գործում շոշափելի առաջընթաց չեղավ: Բանն այն է, որ Հայաստանի իշխանություններին վերջին տարիների ընթացքում հաջողվել է Մոսկվայի հետ այնպիսի հարաբերություններ հաստատել, որոնց դեպքում այնքան էլ կարևոր չէ, թե Կրեմլում նստած ամենաբարձր պաշտոնյայի ազգանունն ինչ է: Սակայն դեպի Պուտին կողմնորոշումը, թերևս, Երևանում դեռ պահպանվել է:
