Աստանայում երեկ ուշ երեկոյան տասժամյա քննարկումներից հետո ավարտվեց ԵԱՀԿ գագաթնաժողովը։ Գագաթնաժողովի ավարտին ԵԱՀԿ-ի անդամ 56 պետությունների ղեկավարներին ամփոփիչ ուղերձով դիմեց Ղազախստանի նախագահ Նուրսուլթան Նազարբաևը. «Աստանայի հուշագրով մենք վերահաստատեցինք մեր աջակցությունը անվտանգության հարցում վստահության և թափանցիկության վրա հիմնված համակարգված մոտեցմանը: Սա բոլորիս համար պատմական հաջողություն է»: Այս ուղերձից րոպեներ անց մինչդեռ Միացյալ Նահանգները և ԵՄ-ն ափսոսանք հայտնեցին, որ ԵԱՀԿ-ն չկարողացավ ընդունել հստակ գործողությունների ծրագիր: Մասնավորապես ԱՄՆ ներկայացուցիչը նշել էր. «Մենք այսօր Աստանայում աջակցություն հայտնեցինք մեր ընդհանուր ընկալումներին և ընդհանուր սկզբունքներին: Իհարկե, ԱՄՆ-ը ափսոսանք է հայտնում, որ մեզ չհաջողվեց Աստանայում գործողությունների ծրագիր համաձայնեցնել, որում կամրագրվեին ԵԱՀԿ-ի հետագա ուղղությունները»: Ուստի ԵԱՀԿ անդամ պետությունների ներկայացուցիչները որոշել էին ընդունել Աստանայի հռչակագիր, որը կհաստատի ԵԱՀԿ հիմնական սկզբունքները:
Աստանայում տեղի ունեցած չհաջողված գագաթնաժողովին «Առաջին լրատվական»-ի հետ զրույցում Հայ Ազգային Կոնգրեսի ներկայացուցիչ Դավիթ Շահնազարյանը այսպիսի գնահատական տվեց. «Աստանայի գագաթնաժողովում առավելապես բացահայտվեցին այն հակասությունները, որոնք գոյություն ունեն ԵԱՀԿ անդամ պետությունների միջև: Այդ հակասությունների բացահայտումը առաջին հերթին պայմանավորված է ԵԱՀԿ անդամ պետությունների տարածքներում հակամարտությունների առկայությամբ, ինչպես նաև` ընդհանուր Եվրոպական անվտանգության շուրջ առկա տարաձայնություններով: Կարծում եմ, որ այդ հակասությունները մոտ ապագայում էլ ավելի բացահայտ կդրսևորվեն: Անկեղծ ասած՝ մի այսպիսի հոռետեսական գնահատական էլ կտայի. ԵԱՀԿ-ի՝ որպես կազմակերպության ապագան հիմա շատ ավելի մշուշոտ է, քան Աստանայի գագաթնաժողովից առաջ»: