Ադրբեջանական Salam News գործակալության փոխանցմամբ՝ Ադրբեջանի էներգետիկայի ու արդյունաբերության նախարար Նատիկ Ալիևը հայտարարել է, որ Կասպից ծովի հատակով կարող է նավթամուղ գցվել Ղազախստանից դեպի Ադրբեջան.
«Կանխատեսվում է, որ առաջին փուլում Ղազախստանի «Քաշաղան» հանքավայրից Կասպից ծովով (հեղուկանավերի միջոցով) դեպի Եվրոպա կտեղափոխվի 37 միլիոն տոննա նավթ։ Եթե այդ ծավալը մեծանա, ապա Ղազախստանից դեպի Ադրբեջան կարող է գցվել ստորջրյա նավթամուղ։
Ներկայումս որոշակի խնդիրներ են առաջացել «Քաշաղան»-ի շահագործման շուրջ։ Հուսով եմ, որ մի քանի տարի անց այն կսկսի գործել։ Դրանից հետո Ղազախստանին հնարավորություն կընձեռվի սեփական նավթը եվրոպական շուկաներ հասցնել ոչ միայն Ռուսաստանի տարածքով, այլև «Բաքու-Թբիլիսի-Ջեյհան» նավթամուղի (ԲԹՋ) միջոցով։
Ադրբեջանն աջակցում է եվրասիական նավթային միջանցքի ստեղծմանը։ Այսօր Ադրբեջանն ի վիճակի է առանց որևէ խնդրի ընդունել 20 միլիոն տոննա ղազախական կամ այլ երկրի նավթ»։
Հիշեցնենք, որ ներկայումս ղազախական նավթը Ռուսաստանի տարածքով Եվրոպա է հասնում 1510 կիլոմետր երկարություն ունեցող «Թենգիզ-Նովոռոսիյսկ» նավթամուղի միջոցով։