«Ղարաբաղ» կոմիտեի անդամ Աշոտ Մանուչարյանի դիտարկմամբ՝ առաջիկայում Հայաստանում պետք է մի ֆունդամենտալ հարց որոշել` արդյոք լինելո՞ւ է առճակատում, թե՞ ոչ. «Այսօր Հայաստանը գնում է հնարավոր ապստամբության ուղիով»:
Լրագրողների հետ հանդիպման ժամանակ Մանուչարյանը նկատեց, որ ժողովուրդն այսօր ապստամբ է, խիստ դժգոհ այս իրավիճակից, իսկ ՀԱԿ-ն իր գործունեությամբ պարզապես կորցրել է ժողովրդի վստահությունը և չի կարողանում առաջնորդել այդ ապստամբությունը: Երկխոսության հնարավորությունը կորցնելը ևս, ըստ բանախոսի, ժողովրդի վստահության կորստով է պայմանավորված, քանզի, նրա դիտարկմամբ, երկխոսությունը կարող էր հիմնվել միայն ժողովրդի կամքի վրա:
Աշոտ Մանուչարյանը նշեց, որ Հայաստանում հասունացած ապստամբությունը տեղի կունենա, եթե այն ղեկավարի մի այնպիսի ուժ, որը կհաղթահարի իր խեղվածությունը և գործունեությունը խեղված աշխարհում:
Մանուչարյանը նկատեց, որ լարվածությունը առաջիկայում աճելու է, իսկ ապստամբության մակարդակի հասնելու համար կան բազմաթիվ գործոններ, այդ թվում`արտաքին:
«Հայաստանում ժողովրդական ապստամբության մեջ ներդրումներ են լինելու` հասարակական կազմակերպությունների, հանկարծ Հայաստանի նկատմամբ սրտացավ դարձած մարդկանց հայտնվելու դրսևորումներով, և փորձելու են հարմարեցնել այս կամ այն ուժին»,- նկատեց Մանուչարյանը՝ հավելելով, որ այս ամենի մեջ Հայաստանի համար հարցերի հարցը պետք է լինի, թե ինչքանով ժողովուրդը կապստամբի և կդառնա իրավիճակի տերը:
Հարցին, թե հնարավո՞ր է Ռոբերտ Քոչարյանի վերադարձով առաջին ու երրորդ նախագահները միավորվեն, Մանուչարյանը պատասխանեց. «Խեղված Հայաստանն այսօր ունի գործող երեք հիմնական ուժեր, որոնք կապվում են երեք նախագահների հետ, նրանցից դուրս կա մի հսկայական հատված, որը ոչ մի կերպ չի ձևավորվում որպես ինքնուրույն ուժ: Ցանկացած խճանկար այս երեքի վերաբերյալ կարող է ստացվել ոչ այնքան իրենց կամքով, որքան պայմանավորված արտաքին գործոններով ու մեր երկրում բռնկվող գործընթացով»: