Մեծ Բրիտանիայի արտաքին գործերի նախարար Վիլյամ Հեյգը երեկ հայտարարել է, թե եվրոգոտին նման է «այրվող շինության, որի ելքերը փակ են»: «Ես ավելի վաղ էլ էի եվրոգոտին նմանեցնում այրվող շինության, որի ելքերը փակ են, և իրավացի դուրս եկա: Դա հիմա վերաբերում է եվրոգոտու մի շարք երկրների: Գուցե սա չափազանցված համեմատություն է, սակայն եվրոգոտին ստեղծվել է այնպես, որ այնտեղից գրեթե անհնար է դուրս գալ, այդ պատճառով Հունաստանի համար հիմա դժվար է դա անել»,- ասել է արտգործնախարարը: Այս մասին հաղորդում է BBC-ն:
Եվրոգոտու ղեկավարները վերջին շրջանում քննարկել են Հունաստանի պարտքերի խնդրի առնչությամբ եվրոգոտու ապագայի հարցը: Նույնիսկ դիտարկվել է Հունաստանը եվրոգոտուց դուրս թողնելու հարցը: Սակայն երեկ Եվրահանձնաժողովի նախագահ Ժոզե Մանուել Բառոզուն խոստացել է, որ Հունաստանը կմնա այդ գոտում` հավելելով, որ, այդուհանդերձ, այս ճգնաժամն ամենալուրջն է Եվրամիության գոյության ողջ ընթացքում:
