Աստանայում կայացած ԵԱՀԿ գագաթնաժողովի ընթացքում Սերժ Սարգսյանի ելույթին անդրադառնալով՝ «Նորավանք» գիտակրթական հիմնադրամի տնօրեն Գագիկ Հարությունյանը նշեց, թե առաջին անգամ չէ, որ Սերժ Սարգսյանը խոսում է ԼՂՀ անկախության ճանաչման մասին. «Իմ կարծիքով, ակնհայտ է այն հանգամանքը, որ Հայաստանը դե-յուրե կճանաչի ԼՂՀ-ի անկախությունը: Մենք դե-ֆակտո դա արել ենք, իսկ դե-յուրե ճանաչումը պարզապես մեր վճռականության լրացուցիչ վկայությունը կլինի»:
Խոսելով պատերազմի հավանականության մասին՝ Հարությունյանը կարծիք հայտնեց, որ պատերազմի վտանգ միշտ կա, երբ 50 մետրի վրա զորքեր են կանգնած և կրակում են միմյանց վրա: Նրա գնահատմամբ, մեր անվտանգության երաշխիքը հայկական բանակն է և մեր հասարակությունը. որքան պատրաստ լինի մեր հասարակությունը այդ պատերազմին, այնքան դրա վերսկսման հավանականությունը ավելի փոքր կլինի: