Երեկ WikiLeaks-ը հրապարակեց Թբիլիսիից Վաշինգտոն ուղարկված հաղորդագրությունները։ Դրանցից մեկում, որը Միացյալ Նահանգներ է ուղարկվել է 2007 թ. հուլիսին, խոսվում է Վրաստանում Ռուսաստանի ակտիվ միջոցառումների մասին:
«Ծայրահեղական փոքրամասնություններին աջակցություն» վերնագրի ներքո Թբիլիսիում ԱՄՆ դեսպանատունը գրել էր. «Վրաստանի իշխանությունները Թբիլիսիում և Ախալքալաքում, ինչպես նաև տեղական համայնքի ղեկավարներն ու քաղաքական ակտիվիստները հաստատել են, որ Ռուսաստանի իշխանությունները ֆինանսավորել են ծայրահեղական հայ ազգայնականներին Սամցխե-Ջավախեթիում` փորձելով ապակայունացնել այս բազմազգ և քաղաքականապես անկայուն տարածաշրջանը: Լարվածությունը կիզակետին է հասել 2006 թվականի գարնանը, երբ մարտին Ախալքալաքում բուռն ցույցեր էին Ծալկայում ազգությամբ հայի սպանությունից հետո, և մայիսին, երբ ցուցարարները կարճ ժամանակով կասեցրին ռուսական բազաների դուրսբերման առաջին փուլը: Սակայն երբ բազաները դուրս բերվեցին, Ախալքալաքում հուզումները կտրուկ նվազեցին, ինչը վկայում է, որ հավաստի էին Վրաստանի պնդումները, թե լարվածությունը առաջացնում էին այն տարրերը, որ ղեկավարվում էին ռուսական բազաներից»:
Չգրանցված «Վիրք» կուսակցության ղեկավար Դավիթ Ռստակյանը «Ազատություն» ռ/կ-ի հետ զրույցում ասաց, որ իրենք ակտիվորեն մասնակցել են այդ ցույցերին, սակայն կտրականապես հերքեց, թե ՌԴ-ի կողմից ֆինանսավորվել են: «Ես կտրականապես հերքում եմ, որ այդ ֆինանսավորումը անցած լինի իմ և իմ շրջապատի մարդկանց, որովհետև նման բան չեմ նկատել: Իսկ ինչ վերաբերում է, որ ուրիշ մարդիկ են եղել այս պրոցեսներին խառնված, այլ կարգի կազմակերպություններ, ես այդպիսի մարդկանց համար չեմ կարող ասել` եղել է, չի եղել, ես միայն պատասխան եմ տալիս մարդկանց այն շրջանակի համար, որ իրոք ի պաշտպանություն ջավախահայերի շահերի են կանգնած եղել. այդ մարդկանց համար երաշխավորում եմ»,- հայտարարեց Դ. Ռստակյանը:
«Ճիշտն ասած, ես չգիտեմ` ինչ աղբյուրների վրա է հիմնվում դեսպանատունը, որ այդպիսի ինֆորմացիա տվել է կամ չի տվել: Միտինգները միշտ էլ Ջավախքում եղել են բանակի դուրս գալու հետ կապված, ընդ որում, կարծում եմ, որ իրենց` ջավախքցիներին էր առաջին հերթին պետք, որ այս բազան տարածաշրջանից դուրս չգար… Այնպես որ, ես չեմ հասկանում, թե տրամաբանությունը որն է. Ռուսնե՞րը պետք է ֆինանսավորեին, որ մենք մեր ազգային շահերը պահեինք»,- ընդգծել է ջավախահայ գործիչը` հավելելով. «Աղբյուրները, որ այդ մարդիկ ունեն` ո՞ւմ են ֆինանսավորել, ի՞նչ են արել, իրենք պետք է երևի ավելի բաց այդ մասին ասեն, եթե փաստեր ունեն, եթե փաստեր չկան` իմաստը ո՞րն է ենթադրելով՝ այդ մասին խոսել»:
«Նորից կրկնում եմ, ինչ վերաբերում է միտինգներին` դա ջավախահայերիս էր պետք, և հետագայում, երբ ռուսական բազան Ջավախքից հեռացավ, կյանքը ապացուցեց, որ, այո, նա ոչ միայն անվտանգության երաշխիք էր, այլև Ջավախքում կերակրում էր շատ ու շատ ընտանիքների»,- ասել է Դավիթ Ռստակյանը:
