Այսօր՝ վաղ առավոտյան, Կիևի իրավապահ մարմինները, հատուկ ջոկատայինների գլխավորությամբ, ցրել են քաղաքի կենտրոնում` Անկախության հրապարակում, տեղի ունեցող բողոքի ակցիան, որը ժամանակ առ ժամանակ հազարավոր մարդկանց էր հավաքում Մայդանում: Գործողությունն սկսվել է առավոտյան ժամը 04:00-ին. կոմունալ ծառայությունների աշխատակիցները մոտեցել են ցուցարարներին, սկսել հավաքել նրանց վրանները: Կոմունալ ծառայությունների աշխատակիցներին են միացել հատուկ ջոկատայինները` ցուցարարներին դուրս քշելով Մայդանից: Ցուցարարները դիմադրություն չեն ցույց տվել, քանի որ նրանց թիվը շատ քիչ է եղել: Առավոտյան ժամը 06:00-ին Մայդանն ամբողջությամբ ազատվել էր ցուցարարներից: Ցուցարարները բողոքում էին խորհրդարանի կողմից Հարկային օրենսգրքում փոփոխությունների դեմ, որտեղ իշխանություններն առաջարկում են հանել հաստատագրված հարկատեսակով հարկվող՝ փոքր և միջին ձեռներեցության ցուցակում տեղ գտած գործունեության որոշ տեսակներ:
Ցուցարարների շարքում էին ձեռներեցներ, պատգամավորներ, հասարակ քաղաքացիներ:
Այս պահին ողջ հրապարակը շրջապատված է ավելի քան 500 իրավապահներով: Անհնար է մտնել հրապարակ, օգտվել մետրոյի՝ հրապարարկին հարակից տարածքներում գտնվող մուտքերից: Կոմունալ ծառայությունների ներկայացուցիչները շտապ տեղադրում են ամանորյա տոնածառը: