Թուրքմենստանում շարունակվում է այն անձանց հետապնդումը, որոնք ռուսական անձնագրեր ունեն: Պետական գերատեսչությունների բոլոր աշխատակիցները պարտավորվել են հայտնել իրենց այն գործընկերների մասին, որոնք երկքաղաքացիության իրավունք ունեն, իսկ ՌԴ անձնագիր ունեցողներին առաջարկվում է ինքնակամ ներկայանալ կամ հարկադրաբար հեռանալ աշխատանքից: Այս մասին փոխանցում է «Նոր ռեգիոն» լրատվական գործակալությունը` հղում կատարելով թուրքմենական ընդդիմադիր Хроника Туркменистана կայքին:
Իրավապաշտպանների տվյալներով, նախօրեին Թուրքմենստանում գործից հեռացվել են դատախազության հինգ աշխատակիցներ: Ղեկավարությունը հայտարարել է, որ իրենց հայտնի է այն մարդկանց անունները, ովքեր երկքաղաքացիություն ունեն, նրանց առաջարկվել է ինքնակամ ներկայացնել իրենց անձնագրերը: Թուրքմենստանում ռուսական քաղաքացիության հարցը արդիական դարձավ այն ժամանակ, երբ երկիրը դուրս եկավ ԱՊՀ երկրների առանց վիզայի համաձայնագրից:
Ռուսական անձնագիրը թուրքմեններին թույլ էր տալիս հանգիստ մեկնել Ռուսաստան: Մեծամասնությունն օգտվեց երկքաղաքացիություն ստանալու հնարավորությունից ռուս-թուրքմենական երկկողմանի պայմանագիրը կնքելուց հետո: Սակայն հետագայում թուրքմենական իշխանությունները սկսեցին պայքարել ոչ միայն երկքաղաքացիության դեմ, այլ նաև հետևել, որպեսզի բնակչությունը երկար ժամանակով չլքի երկիրը:
Տեղեկացնենք նաև, որ 2003թ.-ի ապրիլի 22-ին այն ժամանակվա նախագահ Նիյազովը երկքաղաքացիության մասին համաձայնագիրը չեղյալ համարելու հրամանագիր էր ստորագրել, որով առաջարկվում էր երկու ամսվա ընթացքում որոշել երկու երկրներից որի քաղաքացիությունն է բնակիչը նախընտրում: Թուրքմենստանում ռուսախոս բնակչության շրջանում իրարանցում սկսվեց, շատերը հրաժարվեցին Թուրքմենստանի քաղաքացիությունից և տեղափոխվեցին Ռուսաստան: Ռուսաստանի ԱԳՆ-ն Նիյազովի կտրուկ հրամանին պատասխանեց, որ իրենք չեն պատրաստվում ընդունել միակողմանի որոշումները և շարունակելու են կիրառել երկքաղաքացիության մասին համաձայնագիրը: