Անգլիայի հավաքականի նախկին գլխավոր մարզիչ Թերրի Վենեյբլսը The Sun պարբերականին տված հարցազրույցում խայտառակություն է համարել 2018 թվականի աշխարհի առաջնությունը Ռուսաստանին վստահելու ՖԻՖԱ-ի որոշումը: Վենեյբլսի խոսքերով, աշխարհում երկու գաղտնի կազմակերպություն է մնացել` ՖԻՖԱ-ն և ԿԳԲ-ն: Վերջինս ենթադրում է, որ ՖԻՖԱ-ն իր որոշումը կայացրել է ռուսական գաղտնի ծառայությունների հրահրած քաղաքական ինտրիգների ճնշման ներքո:
Մարզչի խոսքով՝ եթե ՖԻՖԱ-ի պաշտոնյաները նախապես որոշել էին աշխարհի առաջնությունը վստահել մի երկրի, որտեղ երբևէ չեն անցկացվել նման մասշտաբի մրցումներ, նրանք կարող էին պարզապես զգուշացնել, և իրենք կխնայեին 15 մլն ֆունտ: Նա ընդգծեց, որ Անգլիայի հայտը պաշտպանելու էին եկել արքայազն Ուիլյամսը և վարչապետ Դևիդ Քեմերոնը, մինչդեռ մրցաշարը հանձնեցին Ռուսաստանին, որի վարչապետ Վլադիմիր Պուտինն անգամ հարկ չհամարեց ներկա լինել քվեարկությանը: «Ոչ մի խելամիտ մարդ Ռուսաստանի ներկայացրած հայտը վեր չէր դասի Անգլիայի հայտից»:
