Ռուսաստանի նախագահ Դմիտրի Մեդվեդեւը հայտարարել է, որ մասնակցելու է ՆԱՏՕ-ի գագաթնաժողովին, որը կկայանա Լիսաբոնում, այս տարվա նոյեմբերին:
«Ես ցանկանում եմ հայտարարել, որ ես գնալու եմ Ռուսաստան-ՆԱՏՕ գագաթնաժողովին, որը կկայանա նոյեմբերի 20-ին Լիսաբոնում»,- Դովիլում կայացած Ռուսաստան-Գերմանիա-Ֆրանսիա եռակողմ բանակցություններից հետո համատեղ մամուլի ասուլիսի ժամանակ հայտարարել է Դմիտրի Մեդվեդեւը: «Ես կարծում եմ, որ սա կօգնի փոխզիջումների հասնելու եւ ընդհանուր առմամբ Ռուսաստանի եւ Հյուսիսատլանտյան դաշինքի հարաբերություններին», ավելացրել է նա: Գերմանիայի կանցլեր Անգելա Մերկելն իր հերթին հայտարարել է, որ Մեդվեդեւի մասնակցությունը ՆԱՏՕ-ի գագաթնաժողովին լավ հնարավորություն է Ռուսաստան-ՆԱՏՕ հարաբերությունները լավ հիմքի վրա դնելու համար:
Դմիտրի Մեդվեդեւը խոսել է նաեւ սառեցված հակամարտությունների մասին: Մերձդնեստրի հակամարտությանը անդրադառնալիս նա ասել է, որ կարգավորման բանակցություններին կարելի է վերադառնալ Մոլդովայում խորհրդարանական ընտրություններից հետո:
