Մենք արդեն տեղեկացրել էինք, որ ամերիկյան Նևադա նահանգի Լաս Վեգաս քաղաքում ձերբակալվել էր Ռուսաստանի քաղաքացի Օլեգ Նիկոլայենկոն, որը մի քանի տարի շարունակ օրն առնվազն 2500 անգամ «սպամ» հաղորդագրություններ է ուղարկել էլեկտրոնային փոստով: Իրավապահներն ասում են, որ նա դիտավորությամբ կեղծում էր այդ հաղորդագրությունների անվանումները, և սա նվազագույն մեղադրանքն է, որով սկսվել է քննությունը: Իրավապահները նաև կարծում են, որ Նիկոլայենկոն Mega-D բոթնեթ-ի ստեղծողներից է, որը ողջ աշխարհում վարակված համակարգիչների ցանց էր ստեղծում, որի արդյունքում տարածվում էր աշխարհում սպամի 32%-ը:
Նիկոլայենկոյին հատուկ ծառայությունները ձերբակալել են այն ժամանակ, երբ հայտնաբերել են մի ընկերություն, որը կեղծ Rolex ժամացույցներ է վաճառել` սպամի միջոցով առաջարկներ ուղարկելով հաճախորդներին: Նիկոլայենկոյի էլ. հասցեն գրանցված է եղել gmail-ում, ինչը թույլ է տվել իրավապահներին հեշտությամբ հայտնաբերել «սպամի թագավորին»:
