Այսօր հրավիրված ասուլիսի ընթացքում ՀԱԿ կենտրոնական գրասենյակի համակարգող Լևոն Զուրաբյանը հիշեցրեց, որ որ Լևոն Տեր-Պետրոսյանը հանրահավաքներից մեկում նշել է, թե «արաբական տարբերակը» դնում ենք պահեստային մաս: Հարցին, թե հիմա կարո՞ղ ենք ասել, որ այն պահեստային մասից դուրս է եկել, նա պատասխանեց. «Երբ ժողովուրդը ոտքի է կանգնում, իշխանությունն ինքը պետք է որոշի, ո՞ր տարբերակն ընտրել նրա պահանջների բավարարման համար` գնալ քաղաքակիրթ ճանապարհով, թե՞ գնալ քաղաքացիական պատերազմի և արյունահեղության ճանապարհով»:
Ինչ վերաբերում է այն հարցին, թե հանրահավաքները սակավամարդ են, Լևոն Զուրաբյանը նկատեց, որ ընդհակառակը` հանրահավաքից հանրահավաք մարդկանց թիվն ավելանում է. «Եվ ես զարմանում եմ, որ գալիս եք այստեղ` նման պնդումներ եք անում: Մարդկանց քանակը չի հասել մարտյան հանրահավաքի քանակին այն պատճառով, որ ժողվուրդը սպասում էր երկխոսության զարգացմանը: Սեպտեմբերին, թե ինչքան մարդ կլինի` կտեսնենք միասին, բայց մի խնդրանք` եղեք անաչառ: Նույնիսկ հաշվել չիմացող ոստիկանության տվյալներով` հանրահավաքի մասնակիցների թիվն ավելացել է»:
Լևոն Զուրաբյանը նաև տեղեկացրեց, որ ռուսական իշխանությունների հետ հանդիպում են ունեցել և դրանք շարունակվում են: «Ավելին, ոչ միայն ռուսական: Օրինակ` վերջերս եվրոպացի դեսպանների հետ է հանդիպում ունեցել: Բոլորի հետ քննարկում են նույն հարցերը, բոլորին հետաքրքրում է` ինչ է կատարվում Հայաստանում, և ուր են տանում այդ զարգացումները:
Լևոն Զուրաբյանը, բավարարելով լրագրողների հետաքրքրությունը, ավելացրեց, որ «իշխանության վրա ճնշում գործադրել» ասելով` նկատի ունեն այն, ինչը թույլ է տալիս Սահմանադրությունը: Այսինքն` առանց զենքի հավաքներ և զանգվածային այլ միջոցառումներ. «Եվ մենք ազատ ենք` ընտրել այդ զինանոցից ամենաարդյունավետ միջոցները»:
Ինչ վերաբերում է այն հարցին, թե ժողովուրդն առաջարկությունները ինչ կերպ ներկայացնի, Զուրաբյանը հարցրեց` ինչ է չգիտե՞ք և ավելացրեց. «Կարող եք առաջարկությունները գրասենյակ բերել, նամակով ուղարկել, սկայպով ուղարկել, չգիտեմ էլ ինչ ասեմ»:
Երկխոսության շարունակության մասին խոսելով նա ասաց, որ այն իրենց համար երբեք ինքնանպատակ չի եղել, իրենք նպատակ են ունեցել այդ ճանապարհով անցնել ժողովրդավարությանը: «Եթե երկխոսությունը ծառայում է այդ նպատակին` կանցնենք երկխոսությանը: Բայց զարգացումները ցույց տվեցին, որ չծառայեց իր նպատակին, ուրեմն պետք է անցնենք այլ ճանապարհի»,- ասաց Զուրաբյանը:
Պուտինի առաջադրմաբ խոսվում է Ռոբերտ Քոչարյանի վերադարձի մասին, և հնարավո՞ր է, որ ՀՀԿ-ն ու ՀԱԿ-ը միան` Ռոբերտ Քոչարյանին դեմ դուրս գալու համար: Այս մասին խոսելով` Զուրաբյանն ասաց. «Ինչ վերաբերում է, որ Պուտինը Քոչարյանին կաջակցի, դա համարում եմ հիմարություն, Ռուսաստանը լուրջ պետություն է և խիմեռաներով չի զբաղվում»:
Լրագրողները հետաքրքրվեցին, թե կարելի՞ է ենթադրել, որ սեպտեմբերի 30-ին ջրբաժանն է, թե՞ հետո ժամկետները կերկարաձգվեն: «Եթե այդքան կասկածամիտ եք, սեպտեմբերի 30-ին եկեք հանրահավաք, տեսե՛ք, որոշողը ժողովուրդն է»,- ավելացրեց Լևոն Զուրաբյանը:
