РИА-Новости -ն հայտնում է, որ հունգարական «Դեբրեցեն» ակումբի ֆուտբոլիստը կոտրել է Խարկովում Լեհաստանի հյուպատոսության պահակակետի լուսամուտը: Դեպքը պատահել է դեկտեմբերի 1-ի գիշերը. նույն օրը երեկոյան «Դեբրեցեն»-ը Եվրոպայի Լիգայի խաղարկությունում պարտվել էր Խարկովի «Մետալիստ»-ին:
Խաղից հետո «Դեբրեցեն» ակումբի երկու ֆուտբոլիստներ դուրս են եկել Խարկովում զբոսնելու: Նրանցից մեկը ալկոհոլի ազդեցության տակ բռունցքով մի քանի անգամ հարվածել է Լեհաստանի հյուպատոսության պահակակետի լուսամուտին: Արդյունքում ապակին կոտրվել է: Հյուպատոսությունը հսկող զինվորականները երկու ֆուտբոլիստին էլ բերման են ենթարկել և ուղեկցել ոստիկանության մոտակա բաժին: Բացատրություններից հետո նրանց դեմ գործ են հարուցել և ազատ արձակել: Անուններ չեն նշվում, բայց հայտնի է, որ նրանցից մեկը ծնվել է 1977 թվականին, մյուսը` 1986 -ին:Ապակին կոտրել է նրանցից ավագը:
Ակումբի պաշտոնական կայքում նշված են երկու 1977 թվականին ծնված խաղացողներ` պաշտպան Ադամ Կոմպոշին ու հարձակվող Պետեր Կաբատը: 1986 թվականին ծնվածները երեքն են` պաշտպան Լասկո Ժոլտը, կիսապաշտպաններ Շլիցմյուլլերը և Սակալին: Ակումբն առայժմ չի մեկնաբանել տեղի ունեցածը:
