Աստանայում երեկ ուշ երեկոյան տասժամյա քննարկումներից հետո ավարտվեց ԵԱՀԿ գագաթնաժողովը։ Աստանայի գագաթնաժողովի ավարտին ԵԱՀԿ անդամ 56 պետությունների ղեկավարներին ամփոփիչ ուղերձով դիմել է 2010 թ. տարեվերջի այդ ամենախոշոր միջազգային քաղաքական հավաքը հյուրընկալած երկրի նախագահ Նուրսուլթան Նազարբաևը։
«Աստանայի հուշագրով մենք վերահաստատեցինք մեր աջակցությունը անվտանգության հարցում վստահության և թափանցիկության վրա հիմնված համակարգված մոտեցմանը»,- ասել է Նազարբաևը և ավելացրել. «Սա բոլորիս համար պատմական հաջողություն է, որը համապատասխանում է ավելի լավ և անվտանգ աշխարհի մասին մեր ժողովուրդների ակնկալիքներին։ Հուշագրի ընդունմամբ կազմակերպության կյանքում մեկնարկում է նոր փուլ»։
Միջազգային գործակալությունները հայտնում են, որ հուշագրի դռնփակ քննարկումը բավականին թեժ է եղել։ Այն պետք է ավարտվեր դեռ կեսօրին, սակայն ձգձգվել և ավարտվել է միայն կեսգիշերին։ Հուշագրում նշվում է, որ հարկ է ակտիվացնել ԵԱՀԿ տարածքում առկա հակամարտությունների` բանակցությունների ճանապարհով խաղաղ կարգավորման գործընթացները։ Դրանք պետք է իրականացվեն համաձայնեցված ձևաչափերով, և հիմքում պետք է դրվեն ՄԱԿ-ի Կանոնադրության և Հելսինկյան հռչակագրում արտացոլված միջազգային օրենքների նորմերը և սկզբունքները։
Գագաթնաժողովն այնուամենայնիվ չի ընդունել գործողության նոր ծրագիրը, որը պետք է ներառեր ԵԱՀԿ-ի ավելի մեծ դերակատարությունը անվտանգության ամրապնդման, ինչպես նաև Եվրոպայում և նախկին խորհրդային տարածքում հակամարտությունների կանխման և կարգավորման հարցերում։