Այսօր հայկական և սովետական ֆուտբոլի հայտնի մասնագետ Նիկիտա Սիմոնյանը փոքրիկ հարցազրույց է տվել «Советский Спорт» օրաթերթին, որը ներկայացնում ենք ձեր ուշադրությանը:
«Խոսքը տալիս ենք իմաստուն մի մարդու, որն իր առջև խնդիր է դնում` աշխարհի առաջնությունը տեսնել կայտառ և ուժով լեցուն: 2018 թ. Ռուսաստանի ֆուտբոլային միության փոխնախագահի 92-ամյակն է լրանալու:
– Նիկիտա Պավլովիչ, դուք Մուտկոյի և Կոլոսկովի հավատարիմ դաշնակիցն եք , և քվեարկության արդյունքների մասին կանխա՞վ գիտեիք:
– Ես ոչինչ չեմ իմացել: Երբ սկսվեց Բլատերի մամուլի ասուլիսը, հուզվում էի: Կողքիս նստածներն ինձ հանգստացնում էին. «Հանգիստ, Նիկիտա Պավլովիչ, մենք հաղթելու ենք»: Եվ ահա, Բլատերը բացում է ծրարը. Ռուսաստա՛ն: Երջանիկ մի պահ։ Բոլորին շնորհավորում եմ: Թող բոլորն ուրախանան:
– Նիկիտա Պավլովիչ, ի՞նչ աշխատանք եք Ձեզ համար նախանշել 2018 թ.:
– Դժվար հարց եք տալիս: Գուշակություններ չեմ անում: 2018 թ. ես կլինեմ 92 տարեկան: Իմ առջև խնդիր եմ դնում ապրել մինչև 2018 թ. և տեսնել աշխարհի առաջնությունը իմ հայրենիքում, իմ աչքերով: Եթե դա տրված չէ, ապա… Եթե տրված չէ, ես, այդուամենայնիվ, հպարտ կլինեմ Ռուսաստանի համար:
– Այսօր մեզ մոտ տոն է: Ի՞նչ անենք ՖԻՖԱ-ի հետ, որի գործունեությունը բավականին հեղինակազրկվել է:
– Համաձայնեք, որ մենք չենք կարող նետերն ուղղել ՖԻՖԱ-ի գործկոմի բոլոր անդամների ուղղությամբ անխտիր, այն մարդկանց վրա, որոնք ամեն օր չարչարվում են այդ կազմակերպությունում: Եվ եթե ՖԻՖԱ-ում կան խնդիրներ, ապա դրանք նա ի վիճակի չէ միայնակ լուծել: Իսկ մենք` Ռուսաստանը, տոնում ենք հաղթանակը և պատրաստվում մրցաշարի:
– Ֆուտբոլային Ռուսաստանն այսօր նոր կարգավիճակ ստացավ: Բայց հին խնդիրները մնացել են:
– Եվ այդ կապակցությամբ ես ուզում եմ ասել, որ մենք չպետք է թաքցնենք առօրյա խնդիրները: Առաջին հերթին պետք է խոսենք բացասական երևույթների մասին, ագրեսիայի մասին: Մենք պետք է օրինակ վերցնենք անգլիացիներից, որոնք ժամանակին հաղթահարել են այդ երևույթները: