Anonymous և RevoluSec խմբերի հաքերները գրոհել են Սիրիայի պետական կայքերը: Ինչպես հաղորդում է «Ալ- Ջազիրա» հեռուստաալիքը, կայքերում հաքերները տեղադրել են նախագահ Բաշար Ալ-Ասադի ծաղրանկարները, ինչպես նաև տեղեկություն են թողել այն մասին, թե ինչպես կարելի է անվտանգ օգտվել համացանցից` չգրավելով հատուկ ծառայությունների ուշադրությունը:
Հեռուստաալիքի տվյալներով, հաքերները կոտրել են Սիրիայի 7 խոշոր քաղաքների և մի քանի նախարարությունների (այդ թվում՝ տրանսպորտի և մշակույթի նախարարությունների) կայքերը: Քաղաքների պաշտոնական կայքերում տեղադրվել է նաև Սիրիայի ինտերակտիվ քարտեզ, որտեղ նշվում է երկրի տարբեր հատվածներում զոհերի թիվը:
Ինչպես հաղորդում է իսրայելական «Հաարեց» թերթը, յուրաքանչյուր էջի վերջում հաքերները տեղադրել են փաստագրական տեսահոլովակներ ընդդիմադիրների և ոստիկանական ուժերի բախումների մասին: Յուրաքանչյուր կայքում որպես ստորագրություն հաքերները թողել են իրենց տարբերանշանը: Ներկա դրությամբ Դամասկոսի, Հոմսի, Հալեպի, Լաթաքիայի, Տարտուսի, Դեյր ազ-Զորի և Պալմիրայի կայքերն անհասանելի են: Նախարարությունների կայքերն աշխատում են հաստիքային ռեժիմով:
