Այսօր Երևանում մեկնարկեց Հազարամյակի մարտահրավերներ հիմնադրամ – Հայաստան ՊՈԱԿ-ի Ոռոգվող գյուղատնտեսություն ծրագրի Ենթակառուցվածքներ բաղադրիչի որակի հսկողության, առողջապահության և անվտանգության ապահովման, բնապահպանական և սոցիալական հարցերով համատեղ երկօրյա աշխատանքային հանդիպումը: Հազարամյակի մարտահրավերներ կորպորացիայի Հայաստանում մշտական ներկայացուցիչ Ալեքս Ռասինը իր խոսքում նշեց, որ մինչ այս պահը Հայաստանի գյուղական վայրերում իրականացվել են ավելի քան 180 մլն դոլարի ծրագրեր: Դրանք հիմնականում վերաբերել են գյուղական վայրերի ենթակառուցվածքներին` հատկապես ոռոգման ցանցերին: Շինարարական աշխատանքներն իրականացվել են գերազանցապես տեղական կազմակերպությունների հաշվին: Ըստ Ռասինի` այս աշխատանքային հանդիպման նպատակը ոչ թե հաջողություններն արձանագրելն է, այլ կատարված աշխատանքների մեթոդաբանության, տեխնոլոգիաների հետ կապված փորձի փոխանակումը: Ըստ Ռասինի` այս աշխատանքների շնորհիվ մեծ փորձ է կուտակվել, որը հետագայում կարող է առավել բարձր արդյունավետությամբ ու աշխատանքի արտադրողականությամբ զարգացման ծրագրերի իրականացման հիմք հանդիսանալ:
