Երեկ հայտնի դարձավ, որ ֆուտբոլի 2018 թ. աշխարհի առաջնությունը կանցկացվի Ռուսաստանում: Մինչ ընտրությունը Ռուսաստանի Դաշնության վարչապետ Վլադիմիր Պուտինը հայտնել էր, որ չի պատրաստվում ընտրության ժամանակ լինել Ցյուրիխում, որպեսզի ճնշում չգործադրի ՖԻՖԱ-ի անդամների վրա: Իր խոստումը կատարելով` նա միայն ընտրությունն ավարտվելուց հետո մեկնեց այնտեղ` բանակցություններ վարելու ՖԻՖԱ-ի նախագահ Զեպ Բլատերի հետ: Բանակցություններից հետո Պուտինը զրուցել է լրագրողների հետ և մի քանի ուշագրավ հայտարարություններ արել: Նա մասնավորապես ասել է, որ Ռուսաստանին 2018 թ. աշխարհի առաջնության անցկացումը կարժենա մոտ 10 մլրդ դոլար: Մինչ այդ ռուսաստանացի պաշտոնյաները հայտարարել էին, թե 2018 թ. աշխարհի առաջնությունն ավելի քիչ կարժենա, քանի որ արդեն իսկ իրականացվում են շատ օբյեկտների կառուցման աշխատանքները: Ինչ վերաբերում է ճանապարհներին, ապա Ռուսաստանն իրականացնում է դրանց արդիականացման համալիր ծրագիր, որի աշխատանքների մի մասն արդեն ավարտվել է:
Իր հերթին Պուտինն ասել էր նաև, որ պետությունը փորձելու է այնպես գործել, որպեսզի այդ աշխատանքներում ներգրավվի նաև բիզնեսի ոլորտը: «Մենք ցանկանում ենք ներգրավել բիզնեսը, որպեսզի նվազեցնենք պետական ծախսերը: Ես չեմ բացառում, որ պարոն Աբրամովիչը կարող է մասնակցություն ունենալ այդպիսի պրոյեկտներից մեկում»,- հայտարարել է Ռուսաստանի վարչապետը: «Սա աշխատանքի մի մասն է և անվանվում է «պետություն-բիզնես» համագործակցություն»: «Թող մի քիչ առատաձեռնություն ցուցաբերի, ոչ մի սարսափելի բան տեղի չի ունենա: Նա շատ գումար ունի»,- նշել է Պուտինը:
