Грузия Online-ի փոխանցմամբ՝ Վրաստանի փոխարտգործնախարար Դավիթ Ջալագանիան այսօր տեղի ունեցած ճեպազրույցում հայտարարել է, որ Վրաստանի ԱԳՆ-ի համար սպասելի էր կրեմլյան տանդեմի փոխատեղումը, ինչի մասին հայտարարվել է Ռուսաստանի իշխող Единая Россия կուսակցության համագումարում.
«Դրանում որևէ նոր բան չկա, Վրաստանը մշտապես իմացել է, որ այդ ամենը նախապես պլանավորված էր։ Դա ի ցույց դրեց մեր այն մոտեցման ճշմարտացիությունը, թե ով է Ռուսաստանի իրական տիրակալն ու ղեկավարը։ Այդ հայտարարությունն անսպասելի չէր, սակայն մեծ լավատեսության տեղիք չի տալիս՝ հաշվի առնելով թե ինչպիսի քաղաքականություն են վարում վերոնշյալ թեկնածուներն ու նրանց կուսակցությունը։
Այդ տեղեկատվությունը տարածաշրջանի և միջազգային հանրության համար ուշադրության արժանի ազդանշան է, և բոլոր շահագրգիռ կառույցները պետք է ադեկվատ եզրակացություններ կատարեն»։
Հիշեցնենք, որ Ռուսաստանի ներկայիս վարչապետ Վլադիմիր Պուտինը հաջորդ տարի կայանալիք նախագահական ընտրություններում առաջադրելու է իր թեկնածությունը, իսկ ներկայիս նախագահ Դմիտրի Մեդվեդևը դառնալու է վարչապետ։
Ի դեպ, այս տարվա ապրիլի վերջին Վրաստանի նախկին նախագահ Էդուարդ Շևարդնաձեն ընդգծել էր, թե 2012 թվականին Ռուսաստանում կայանալիք նախագահական ընտրություններում ում թեկնածությունն է ձեռնտու Վրաստանին.
«Իմ կարծիքով, Վրաստանին առավել ձեռնտու է Պուտինի` նախագահ դառնալու տարբերակը: Պետք է հիշել, որ Ռուսաստանի ներկայիս նախագահ Դմիտրի Մեդվեդևը հրաժարվեց Վրաստանի նախագահ Միխեիլ Սաակաշվիլիի հետ բանակցելուց:
Բացի այդ, ուշադրության արժանի է այն հանգամանքը, որ հենց Վլադիմիր Պուտինն է ժամանակին ընդունել վրացական ընդդիմության առաջնորդներին: Ես չեմ բացառում, որ նախագահ դառնալուց հետո Պուտինը բանակցություններ կվարի Սաակաշվիլիի հետ: Պուտինն առավել լոյալ է տրամադրված վրացիների հանդեպ»։
