Ինչպես փոխանցում է The Daily Maily-ը, բրիտանացի իրավապահներն արդեն այսօր կձերբակալեն WikiLeaks կայքի հիմնադիր Ջուլիան Ասանջին: Հիշեցնենք, որ սկանդալային կայքի հիմնադրին, որը արդեն մի քանի ամիս է՝ ամերիկյան դիվանագիտության գաղտնի փաստաթղթեր է հրապարակում իր կայքում, Շվեդիայի ոստիկանությունը մեղադրում է բռնաբարության և սեռական ոտնձգության համար: Նրա դեմ արդեն միջազգային հետախուզում է հայտարարվել: Երեկ հայտնվեցին տեղեկություններ, որ Ասանջը գտնվում է Բրիտանիայում, սակայն Սքոթլանդ Յարդը չի շտապում նրան ձերբակալել, քանի որ շվեդական կողմը չի ներկայացրել բավարար փաստաթղթեր, որոնք կապացուցեն նրա մեղավորությունը: Բրիտանացիները երեկ նույնիսկ հայտարարեցին, որ պատրաստ էին նրան ձերբակալել, սակայն շվեդները փաստաթղթերը ճիշտ չէին ձևակերպել: Ասանջի ձերբակալությունն արդեն այսօր կարող է իրականություն դառնալ:
Սքոթլանդ Յարդի մասնագետներն անցած գիշեր աշխատել են 39-ամյա Ասանջի ձերբակալության փաստաթղթերի վրա: Իսկ էքստրադիցիայի փաստաթղթերը բրիտանացիները կարող են ստանալ կա՛մ այս շաբաթվա վերջին, կա՛մ ամենաուշը հաջորդ շաբաթվա սկզբին: