Չորային եղանակի պատճառով Իսրայելում աղետալի իրավիճակ է ստեղծվել: Իսրայելական իշխանությունները ստիպված են եղել Հայֆայի շրջանից ավելի քան 13.000 մարդու տեղահանել, այդ թվում՝ մոտ 600 բանտարկյալների այդ տարածքի բանտերից: Իսրայելական լրատվամիջոցները հայտնում են, որ շրջանում հրդեհը սկսվել է հինգշաբթի ցերեկը միանգամից 3 ուղղություններով: Հրդեհների ընդհանուր մակերեսը կազմել է 2,8 հազար հեկտար: Օրվա ընթացքում հրշեջները խոստովանել են, որ կրակը դուրս է եկել իրենց վերահսկողությունից: Իրավապահները կարծում են, որ դա չորային եղանակի հետևանք էր, այլ ոչ թե հրդեհելու դիտավորյալ փորձ: Իսրայելի վարչապետ Բենիամին Նաթանյահուն արդեն հայտարարել է, որ տարհանումը կշարունակվի, քանի որ այլ դեպքում ավելի շատ զոհեր կլինեն:
Մինչ այդ արդեն հայտնի էր դարձել, որ հրդեհի պատճառով մոտ 40 մարդ էր զոհվել: Զոհվածներն ավտոբուսով մեկնել էին տեղի բանտերից մեկը, որպեսզի բանտարկյալներին տեղահանեին, սակայն հրդեհի պատանդ էին դարձել: Զոհվածների մեջ հրշեջներ և ոստիկաններ էլ կան:
Իսրայելին ստեղծված իրավիճակում օգնություն են առաջարկել Հունաստանն ու Կիպրոսը:
Վերջին ամիսների լարվածության ֆոնին հետաքրքիր է, որ Թուրքիայի կառավարությունն էլ է առաջարկել իր օգնությունը:
France Presse գործակալության փոխանցմամբ, Թուրքիայի վարչապետ Ռեջեփ Թայիփ Էրդողանն արդեն ստորագրել է հրամանագիր Իսրայել երկու հրշեջ օդանավ ուղարկելու մասին: Թուրքիայի արտակարգ իրավիճակների գործակալության ղեկավար Մեհմեթ Էրզոյը հայտարարել է, որ սա «մարդասիրական օգնություն է»: Ավելի վաղ Իսրայելը օգնության խնդրանքով դիմել էր մի քանի երկրների:
