«Առաջին լրատվականի» հետ զրույցում քաղտեխնոլոգ Սրմեն Բադալյանն անդրադարձավ այն հարցին, թե ինչքանո՞վ է հնարավոր Պուտին-Մեդվեդև վերադասավորման պրոյեկտումը հայաստանյան քաղաքական դաշտում:
Հիշեցնենք, որ Պուտինը առաջադրվելու է որպես նախագահի թեկնածու, իսկ Մեդվեդևը վերադառնալու է կառավարություն` առաջիկա խորհրդարանական ընտրություններում գլխավորելով «Եդինայա Ռոսիա» կուսակցության համամասնական ցուցակը:
Բադալյանը նկատեց, որ Պուտինի նախագահ դառնալը կազդի Հայաստանի խորհրդարանական ուժերի վրա: Այդուամենայնիվ, ըստ քաղտեխնոլոգի, Պուտին-Քոչարյան լավ հարաբերություններն այս իրավիճակում որոշիչ դեր չեն ունենա, որպեսզի Քոչարյանն ակտիվանա հայաստանյան քաղաքական դաշտում: Ըստ նրա՝ ընկերական հարաբերությունները քաղաքականության մեջ չեն աշխատում և որպես օրինակ բերեց Պուտին-Յանուկովիչ նախկին և ներկա հարաբերությունները:
Քաղտեխնոլոգը նշեց, որ Պուտին-Մեդվեդև վերադասավորման ուղղակի պրոյեկտում Հայաստանում հնարավոր չէ, քանզի եթե Ռուսաստանում վերադասավորումներ տեղի ունեցան նախագահի և վարչապետի միջև, ապա Հայաստանում խիստ կասկածելի է, որ տեղի ունենա Սերժ Սարգսյան-Տիգրան Սարգսյան վերադասավորումը. «Ինչ վերաբերում է Քոչարյանին, ապա հաշվի առնելով նրա վատ վարկանիշը հայաստանյան հասարակության մեջ, Ռուսաստանը չի ցանկանա նրան առաջ տանելով իր նկատմամբ անվստահություն առաջացնել հայ հասարակության մեջ»:
Ըստ Բադալյանի՝ իր ազդեցությունը Հայաստանում պահպանելու համար Ռուսաստանը Հայաստանում տասնյակ գործիչներ կարող է գտնել և անգամ բանակցել ՀԱԿ-ի հետ, ու այդ պայմաններում Ռուսաստանն իր վարկանիշը Հայաստանում չի վնասի Քոչարյանին պաշտպանելով:
Արմեն Բադալյանը նաև շեշտեց, որ Պուտինի նախագահության պարագայում Հայաստանի արտաքին քաղաքականության մեջ ևս էական փոփոխություններ չեն լինի, քանզի Հայաստանը արտաքին քաղաքականություն չունի և ունի թույլ նախագահ. «Ռուսաստանը լուրջ խնդիրներ չի ունենա Հայաստանն իր ազդեցության տակ պահելու համար, որովհետև Սերժ Սարգսյանի արտաքին քաղաքականության մեջ հստակություն չկա` ով փող է տալիս, նա էլ իր դաշնակիցն է՝ լինի Ռուսաստանը, թե Արևմուտքը»:
Քաղտեխնոլոգը կարծում է, որ այս ամենը հաշվի առնելով, Ռուսաստանի դիրքերը Հայաստանում է՛լ ավելի կուժեղանան Պուտինի նախագահ ընտրվելու պարագայում:
