Ինչպես գրում է The Glendale News Press-ը, Գլենդելում սպիտակամորթ բնակչության թիվը զգալի աճ է արձանագրել: Վերջին ուսումնասիրությունները ցույց են տվել, որ այդ քաղաքի բնակչության թիվը նվազել է, սակայն աճել է սպիտակամորթների թիվը: Եթե 2000թ. սպիտակամորթները կազմում էին ընդհանուր բնակչության 54%-ը, ապա այս տարի` 62%-ը կամ 117 հազար մարդ: Փորձագետները սա մեծապես կապում են այն փաստի հետ, որ ավելի քիչ հայեր են սկսել իրենց ընկալել որպես ոչ սպիտակամորթ ռասայի ներկայացուցիչներ: 2000թ.-ին հայերի 22%-ը իրենց սպիտակամորթ և մեկ այլ ռասայի ներկայացուցիչ էին համարում, 2009թ.-ին այդ թիվը նվազել է մինչև 1%:
Այս երևույթը նկատվում է նաև հայկական այլ համայնքներում: Դա պայմանավորված է համայնքում տեղի ունեցող փոփոխություններով: Տեղի հայկական դպրոցից Վազգեն Մադենլյանն ասել է, որ ինքը զարմացած չէ այս փոփոխություններից, քանի որ դա նաև պայմանավորված է ԱՄՆ-ում ծնված երեխաների ավելի ինտեգրված լինելու հանգամանքով: «Ոմանք ինձ հարցնում են, թե ո՞վ են իրենք և արդյո՞ք իրենք հայ են: Ես նրանց պատասխանում եմ` իսկ դուք ինչպե՞ս եք կարծում: Նայե՛ք հայելու մեջ»,- ասել է Մադենլյանը:
Հետազոտության մեջ ասվում է նաև, որ Գլենդելում կրճատվում է լատինոսների թիվը՝ 20%-ից մինչև 17%: Փորձագետները սա կապում են այս քաղաքում անշարժ գույքի գների աճի հետ, ինչն իրենց չեն կարող թույլ տալ քիչ եկամուտ ունեցող լատինաամերիկացիները:
