Հայաստանում տեղական ինքնակառավարման համակարգի ներդրման 15-ամյակին նվիրված միջոցառումների շրջանակում սեպտեմբերի 4-5-ը Վանաձորում, 8-9-ը Գյումրիում տեղի ունեցավ միջհամայնքային մշակութային առաջին ցուցահանդեսը և մրցույթ-փառատոնը, որի կազմակերպիչներն են Տարածքային կառավարման և Մշակույթի նախարարությունները:
Լրագրողների հետ հանդիպման ժամանակ ամփոփելով միջոցառումները՝ ՏԿ փոխնախարար Վաչե Տերտերյանը նշեց. «Միջոցառումները ցույց տվեցին, որ չնայած խնդիրներին, մեր համայնքներում գոյություն ունեն մշակութային խմբեր»: Նա շնորհակալություն հայտնեց միջհամայնքային մշակութային առաջին ցուցահանդեսի և մրցույթ-փառատոնի ընթացքում աշխատած 5 հանձնաժողովների ներկայացուցիչներին. «Դուք մեծ փայլ տվեցիք համայնքային միջոցառումներին»:
Մրցույթն անցկացվել է 14 անվանակարգերում` լավագույն թատերական խումբ, մշակութային լավագույն գյուղական համայնք, մշակութային լավագույն քաղաքային համայնք, լավագույն մրցույթի դիտում, լավագույն թանգարան, լավագույն տեսաֆիլմ և այլն:
Մշակույթի փոխնախարար Արթուր Պողոսյանը խնդիրների շարքում նշեց, որ մարզերից եկած համույթները չեն ներկայացրել իրենց մարզերին բնորոշ պարեր: Նա նշեց, որ միջոցառումները լինելու են շարունակական: Պատասխանելով «Առաջին լրատվականի» հարցին, թե որքա՞ն գումար է ծախսվել միջոցառումների անցկացման համար՝ Տերտերյանը հայտնեց, որ ընդհանուր գումարը եղել է 25 միլիոն դրամ, դրանից 5 միլիոնը հատկացվել է պետական բյուջեից, իսկ մնացածը ֆինանսավորել են հովանավորները, որպես դրամական պարգևներ հատկացվել է 11 միլիոն դրամ:
