Հոկտեմբեր ամսին Մոսկվայի քաղաքապետ Յուրի Լուժկովի հրաժարականից հետո լուրջ անախորժություններ են սկսվել նրա ընտանիքի անդամների դեմ: Մի քանի գործերով քննություն է սկսվել նրա կնոջ նկատմամբ` աշխարհի ամենահարուստ կանանցից մեկի՝ Ելենա Բատուրինայի դեմ:
Այսօր հայտնի է դարձել, որ աշխատանքից ազատվել է Յուրի Լուժկովի՝ առաջին կնոջից որդին` Միխայիլ Լուժկովը: Նա աշխատել է «Газпром межрегионгаз» ընկերությունում՝ որպես ղեկավարի տեղակալ, որը Գազպրոմ ընկերության դուստր ձեռնարկություններից է: Ընկերության պաշտոնական հաղորդագրության մեջ ասվում է, որ «օպտիմալացման և կառավարման գործառույթների կենտրոնացման ծրագրի շրջանակներում տեղի են ունեցել ղեկավար պաշտոնների կրճատումներ, այդ թվում նաև՝ տեղակալների»:
Հայտնի է նաև, որ Լուժկովը Մեծ Բրիտանիա է տեղափոխել իր դստրերին, որոնք իրենց ուսումը շարունակելու են այդ երկրում: