Հայաստանի կառավարությունը մտադիր է «Զվարթնոց» և «Շիրակ» օդանավակայաններում ենթակառուցվածքների բարելավման արդյունքում ունենալ այնպիսի պայմաններ, որ տարեկան սպասարկեն 10 մլն ուղևոր: Այս մասին ասաց Տարածքային կառավարման և ենթակառուցվածքների նախարար Գնել Սանոսյանը Համաշխարհային հայկական գագաթնաժողովի շրջանակում՝ անդրադառնալով ավիացիայի ոլորտին: Նախարարը հիշեցրեց, որ 2023 թվականին առաջին անգամ գրանցվել է ռեկորդային քանակությամբ ուղևորների հոսք՝ 5.4 մլն մարդ: Չնայած այդ փաստն ուրախալի է, սակայն Սանոսյանը նշեց նաև, որ այդ ուղևորահոսքերը կառավարելու առումով որոշակի բարդություններ կան: «Բավականին ժամանակ է՝ ունենք աշխատանքային խումբ, բանակցում ենք «Զվարթնոց»–ի մեր գործընկերների հետ: Որոշ կետեր համաձայնեցնելով գնում ենք, որ կարողանանք ունենալ նոր ներդրումային մեծ ծրագիր, որը կբերի «Զվարթնոց»–ում և «Շիրակ»–ում մի շարք ենթակառուցվածքների բարելավմանը: Իսկ մեր թիրախն ու նպատակն է ունենալ այնպիսի պայմաններ, որ կարողանանք 10 մլն մարդ սպասարկել մեր օդանավակայաններում»,–ասաց նա:Նախարարը կարևորեց նաև ներքին չվերթները: Նպատակ կա Կապանի օդանավակայանը դարձնել տարածաշրջանային օդանավակայան, որտեղից թռիչքներ կիրականացվեն հարևան երկրների քաղաքներ:
