«Պահանջներս օրինական են, արդարացի.
ա. «Արմենիա» հանրապետական հիվանդանոցի տնօրեն Գրիգոր Գրիգորյանի` խարդախության հետևանքով առաջացած նյութական և բարոյական վնասների փոխհատուցում,
բ. Աշխատանքային գրքույկում եղած սխալ գրառումների ուղղում,
գ. Գրիգոր Գրիգորյանին, փոխտնօրեն Սերգեյ Պողոսյանին, վերակենդանացման բաժնի վարիչ Սուրեն Մակարյանին ենթարկել պատասխանատվության ՀՀ քրեական օրենսգրքի 135, 136 հոդվածներով:»
Այս գրությամբ ցուցապաստառը պարզած ՀՀ կառավարության շենքի դիմաց բողոքի ցույցի էր դուրս եկել «Արմենիա» հանրապետական հիվանդանոցի նախկին աշխատակից, բուժքույր Նինել Իվանյանը: Այս տարվա նոյեմբերի չորսին նա դիմել է ՀՀ Դատարանների խորհրդի էթիկայի հանձնաժողովի նախագահ Դավիթ Ավետիսյանին: Դիմումում նա նշել է. «1971 թ. հոկտեմբերի վեցից մինչև 2005 թ. հուլիսի ութը աշխատում էի վերը նշված հիվանդանոցում` որպես բուժքույր: Սակայն Գ. Գրիգորյանը ինձ զրկել է աշխատելու իրավունքից, քանի որ ես պահանջում էի իմ աշխատավարձը, որը կազմում է 15350 դրամ: Ես իմ աշխատանքային պարտականությունները կատարում էի ըստ պատշաճի և բարեխղճորեն: Գ. Գրիգորյանը 2004 թ.-ի սեպտեմբերի 4-ին խարդախությամբ, խաբեությամբ, աշխատողների 2001, 2002, 2003, 2004 թվականների աշխատավարձը յուրացնելով, Երևանի նախկին քաղաքապետ Երվանդ Զախարյանի, թաղապետեր Արծրուն Խաչատրյանի, Ռաֆիկ Մկրտչյանի օգնությամբ դառնում է հիվանդանոցի ինքնակոչ սեփականատեր: Քանի որ ես քաջատեղյակ էի Գ. Գրիգորյանի վարքագծին, ոչ մի փաթեթի տակ չեմ ստորագրել, այդ իսկ պատճառով նա իր հանցախմբով 2001 թ.-ից մինչև 2005 թ. հուլիսի 8-ը խարդախություններով, շանտաժների, սադրիչ գործողությունների ենթարկելով՝ ինձ զրկեց աշխատելու իրավունքից»: Դիմելով դատական տարբեր ատյաններ և չկարողանալով պաշտպանել իր իրավունքները` Նինել Իվանյանը պնդում է, որ իր գործը քննող դատավորները կաշառված են և պատրաստվում է հաջորդ հինգշաբթի, կառավարության նիստի օրը, պաստառին գրել նրանց անուններն ու ներկայանալ բողոքի ցույցի: