Ո՞րն է գյուղատնտեսական տարվա հիմնական բացթողումը: «Առաջին լրատվական»-ի այս հարցին Հայաստանի ագրարագյուղացիական միավորման ղեկավար Հրաչ Բերբերյանը պատասխանեց.
«Հիմնական բացթողումն այն էր, որ հանրապետության նախագահը տարվա սկզբին կոչ արեց գնալ ռեֆորմների, ինչը չարվեց: Ընդհանրապես, գյուղատնտեսության ռեֆորմների հետ կապված ոչինչ չարվեց: Այսինքն` այն գաղափարախոսությունը, որ մենք պետք է արտադրողին որպես գործընկեր ներգրավեինք պետության շինարարության մեջ, նրա արտադրանքի հաշվետվությունը իմանայինք, խթանեինք այն, ցավոք, չարվեց:
«Վերևից» երբեք հեղափոխություն չի եղել, պետք է տեղերում դա ձևավորվի: Եկեք տեսնենք, թե որ կոոպերացիան է այսօր հզոր ՀՀ-ում, կես տարի է անցել, ի՞նչ են արել: Համաշխարհային բանկի մի քանի ծրագրով գումարները կան, գնում են շրջանները ման են գալիս ու վերադառնում: Եվ դրանք աշխատո՞ւմ են: Երբ մի բան ստեղծում ես, պետք է գաղափարախոսություն դնես, եթե ձևական է ստեղծվում, դա վաղ թե ուշ կփակվի: Այն ֆինանսները, որոնք հատկացված են գյուղացուն, պետք է տեղ հասնեն, ոչ թե մնան չինովնիկների ձեռքում: Կրծողների դեմ պայքարում ենք, բայց խնդիրը էլի կա:
Տոնավաճառ ենք փորձում ստեղծել կոմունիստական գաղափարախոսությամբ, որը չի աշխատում այն պատճառով, որ գյուղացին ասում է՝ իմ դաշտի մոտ 50% էժան եմ վաճառում, բայց եթե բերեցի Երևան, շուկայի գնով եմ վաճառելու, և այդպես էլ անում է: Ինչքան ուզում եք՝ կոմունիստական կոչեր արեք, չի աշխատի: Մինչև հիմա «մթերում» բառն են ասում, որը ՀՀ-ում գոյություն չունի, «մթերում» չի, «գնումներ» են: Սկսվել են խաղողի «գնումները»: Տեսնենք, թե ինչպես կվճարեն գյուղացուն»:
