Հայստանի անվտանգության խորհրդի քարտուղարը Ճապոնիայում աշխատանքային ճաշ է ունեցել այդ երկրի ԱԽ քարտուղարի հետ, որի ընթացքում քննարկվել են թե երկկողմ գործակցության, թե ռեգիոնալ ու միջազգային օրակարգի հարցեր: ԱԽ քարտուղարը մինչ այդ աշխատանքային այցով եղել է Հարավային Կորեայում: Այդ ընթացքում, Չինաստան աշխատանքային այց է կատարել Հայաստանի պաշտպանության նախարար Սուրեն Պապիկյանը, որը հանդիպելով իր չին գործընկերոջ հետ, քննարկել է պաշտպանական ոլորտում երկկողմ գործակցությունն ընդլայնելու հարցեր:
Հայաստանը փաստացի բավականին ուշագրավ աշխարհագրությամբ որոշակի ակտիվ օրեր է «անցկացրել» հեռավոր Արեւելքի, առավել ստույգ՝ ասիախաղաղօվկիանոսյան ռեգիոնի ուղղությամբ: Եվ այստեղ իհարկե հարկ է դիտարկել թերեւս ոչ միայն աշծատանքի երկկողմ կարեւորությունը, Հայաստանի համար պաշտպանական, անվտանգային ներուժի հնարավորինս արագ եւ արդյունավետ վերականգնման խնդրի սպասարկման տեսանկյունից: Իհարկե այդ հարցում արդյունավետությունը դեռ պետք է չափվի, հասկանալու համար, թե աշխատանքային այցերը օգտակարության ինչպիսի՞ գործակցով են առարկայական տեսանկյունից:
Սրանով հանդերձ, ասիախաղաղօվկիանոսյան ռեգիոնը ունի թերեւս ուշադրության եւ աշխատանքի ուղղություն լինելու մեկ այլ պատճառ: Ռեգիոնն անկասկած աշխարհաքաղաքական, աշխարհակարգային դիմակայության «ծանրության կենտրոններից» է, թեեւ այդ հանգամանքը գոնե առայժմ չի դրսեւորվում պատերազմի ռեժիիմով: Այդուհանդերձ, ռազմական էսկալացիայի հավանականությունը դիտվում է շատ բարձր, ինչի մասին խոսում է մի քանի գործոն: Սակայն անկախ դիմակայության տաք, թե սառը ռեժիմից, հանգամանքը, որ աայդ ուղղությունը ներկայումս բավականին էական ուղղություն է համաշխարհային քաղաքական հոսքերի տեսանկյունից, կարեւոր է դառնում այնտեղ դերակատար պետությունների հետ հաղորդակցությունը՝ որպես ծավալվող դիմակայության «մմետաստազների» կառավարման գործոն:
Իսկ այն, որ այդ «մետաստազները» ի վիճակի են հասնել ընդհուպ Մերձավոր Արեւելք եւ Կովկաս, այստեղ ազդեցություն ունենալով անվտանգության միջավայրի եւ ռեժիմի վրա, վեր է կասկածից: Առավել եւս, եթե խոսենք դիցուք Ճապոնիայի մասին, Տոկիոն պատմական բավականին խորքային հետագծով հարաբերություն ունի Թուրքիայի հետ, առանձնահատուկ որոշակի ելեւէջներով: Եվ այդ իմաստով, Հայաստան-Ճապոնիա բարեկամական հարաբերությունը, որը Հայաստանի անկախությունից հետո երկկողմ հարաբերության հատկանիշ է վաղուց, ըստ էության կարեւոր գործոն է նաեւ այդ տեսանկյունից:
