ԱՄՀ նախկին նախագահ Դոմինիկ Ստրոս Կանը առերեսում կունենա լրագրողուհի և գրող Տրիստան Բանոնի հետ, որը նրան մեղադրում է բռնաբարության փորձի մեջ: Այս մասին հայտնում է France Presse գործակալությունը: Առերեսումն իրականացվելու է լրագրողուհու պահանջով, որը ցանկանում է առերես հանդիպել իրեն վիրավորած անձնավորության հետ: «Ես ուզում եմ, որպեսզի նա իմ երեսին ասի, որ ես այս ամենը հորինել եմ»,- հայտարարել է Բանոնը:
Բանոնը պնդում է, որ Ստրոս Կանը փորձել է բռնաբարել իրեն հարցազրույցի ժամանակ, որը նա վերցնում էր իր գրքի համար 2003 թ.: Լրագրողուհին դիմումը որոշել է ներկայացնել միայն 2011 թ., երբ Ստրոս Կանը դարձել էր ԱՄՆ-ում սեռական բնույթի սկանդալի մասնակից: Լրագրողուհին նաև պատմել է, որ իրեն դիմել են նաև ուրիշ կանայք, որոնք դարձել են Ստրոսս Կանի զոհը:
ԱՄՀ նախկին նախագահը Բանոնի կողմից հնչեցված մեղադրանքներն անվանել է հորինված և հակընդդեմ հայցով դիմել է դատարան` նրան մեղադրելով զրպարտության մեջ: Հիշեցնենք, որ 2011 թ. մայիսի 14-ին Ստրոս Կանը ձերբակալվել էր Նյու Յորքի օդանավակայանում հյուրանոցներից մեկի սպասուհու հանդեպ սեռական բնույթի ոտնձգություն իրականացնելու մեղադրանքով: Սակայն հետագայում նրա վրայից հանվել են բոլոր մեղադրանքները:
