Թուրքական Anadolu գործակալության փոխանցմամբ՝ Թուրքիայի վարչապետ Էրդողանը ՄԱԿ-ի Գլխավոր ասամբլեայի 66-րդ նիստի շրջանակներում հանդիպում է ունեցել ՄԱԿ-ի գլխավոր քարտուղար Բան Կի Մունի հետ։
Հանդիպման ժամանակ կողմերը քննարկել են Կիպրոսի հարցը։ Էրդողանը Բան Կի Մունին իրազեկել է Նյու Յորքում Թուրքիայի և ինքնահռչակ Հյուսիսային Կիպրոսի թուրքական հանրապետության միջև կնքված համաձայնագրի մասին, որն առնչվում է մայրցամաքային շելֆի մշակմանը։
Էրդողանը հայտարարել է, որ եթե (հունական) Կիպրոսը հրաժարվի Միջերկրական ծովի շելֆի մշակման աշխատանքներից, ապա նույնպիսի քայլ կկատարի Թուրքիան. «Մենք պատրաստ ենք փոխադարձաբար հրաժարվել նավթի ու գազի հետախուզման աշխատանքներից։ Դուք կարող եք այդպիսի առաջարկ անել Կիպրոսի ղեկավարությանը։ Սակայն եթե նրանք իրենցը պնդեն, ապա դա կխոչընդոտի կիպրական հարցին առնչվող բանակցային գործընթացին»։
Հիշեցնենք, որ 2010 թվականի սեպտեմբերի 23-ը Թուրքիայի համար դարձել էր պատմական օր. Թուրքիայի և ՄԱԿ-ի պատմության ընթացքում առաջին անգամ Թուրքիայի ղեկավարն (Աբդուլլահ Գյուլ) էր նախագահում ՄԱԿ-ի Անվտանգության խորհրդի նիստը: