Ինչպես հաղորդում է France Presse լրատվական գործակալությունը, Եգիպտոսի ռազմական դատարանը վեց ամսվա ազատազրկման է դատապարտել մի երիտասարդի, որը եգիպտական բանակի վերաբերյալ Facebook սոցիալական ցանցում խումբ էր բացել:
Ահմեդ Հասան Բասյունին այս խմբի միջոցով փորձել է օգտակար խորհուրդներ տալ բանակ գնացողներին, պատրաստել համապատասխան փաստաթղթեր` խուսափելով եգիպտական զինվորական վարչարարությունից: Այս խմբում նա հոդվածներ է տեղադրել եգիպտական բանակի մասին` վերցնելով դրանք բացառապես մամուլից: «Սա ուղերձ է բոլոր նրանց, ովքեր կփորձեն ինչ որ բան հրապարակել բանակի մաիսն, անկախ նրանից լավ, թե վատ»,- ասել է նրա փաստաբանը: Անցած ուրբաթ Amnesty Intenational-ը դիմել էր իշխանություններին` Բասյունին ազատ արձակելու պահանջով` նշելով, որ այն ամենն, ինչ հրապարակվել է խմբում, բացառապես բաց աղբյուրներից է եղել:
Երիտասարդին ձեռբակալել են անցած ամիս այն բանից հետո, երբ նա ելույթ է ունեցել ռադիոյով: Խմբի անունը Բասյունը դրել է «Զինապարտության և զորահավաքի բաժին»: Նույն անունով եգիպտական պաշտպանության նախարարությունում կա բաժին, ինչն էլ հարուցել է զինվորականների զայրույթը:
«Եգիպտոսի իշխանությունները պետք է դադարեցնեն քաղաքացիներին զինվորական դատարաններում պատասխանատվության կանչելու փորձից: Սա արդար դատավարության և եգիպտական արդարադատության դեմ չարաշահում է»,- ասված է Amnesty Intenational-ի հայտարարության մեջ:
