Դեկտեմբերի 9-ին ԱԺ-ում կրկին քննարկման կներկայացվի «Ժառանգություն» կուսակցության առաջարկած՝ ԼՂՀ-ի ճանաչման վերաբերյալ նախագիծը: «Ժառանգություն» կուսակցության մամուլի խոսնակ Հովսեփ Խուրշուդյանը հիշեցրեց, որ իրենց առաջնորդ Րաֆֆի Հովհաննիսյանը հետաձգել էր այդ նախագծի քննարկումը՝ հաշվի առնելով ԵԱՀԿ սպասվելիք գագաթնաժողովը. «Աստանայի գագաթնաժողովը Հայաստանին ոչինչ չտվեց, հետևաբար դեկտեմբերի 9-ին բոլոր 131 պատգամավորներն էլ պիտի միաձայն կողմ քվեարկեն ԼՂ անկախության ճանաչման փաստաթղթին»:
ԱԺ ՀՀԿ խմբակցության պատգամավոր Արտակ Դավթյանն էլ նկատեց, որ եթե Լեռնային Ղարաբաղի նկատմամբ Ադրբեջանը փորձի ռազմական ագրեսիա ծավալել, այդ ժամանակ Հայաստանն անմիջապես կճանաչի ԼՂ-ի անկախությունը. «Մենք բանակցային գործընթացի մեջ ենք, և այդ գործընթացի տրամաբանությունը մեզ հուշում է, որ այս պահին դեռևս ժամանակը չէ ճանաչելու ԼՂ անկախությունը»:
Արտակ Դավթյանը նշեց, որ համամիտ է Հովսեփ Խուրշուդյանի հետ այն հարցում, որ բոլոր 131 պատգամավորներն էլ պիտի կողմ քվեարկեն ԼՂՀ անկախության ճանաչման նախագծին, սակայն այդ դեկտեմբերի 9-ը պարտադիր չէ, որ լինի հենց 2010 թվին: