Սեպտեմբերի 22-ին ՀՀ Քիմիական զենքի կոնվենցիայի ազգային մարմնում ընդգրկված գերատեսչությունների` Արտաքին գործերի, Էկոնոմիկայի, Էներգետիկայի եւ բնական պաշարների նախարարությունների, Ազգային անվտանգության ծառայության, Պետական եկամուտների կոմիտեի, Գիտությունների ազգային ակադեմիայի եւ «Չտարածման հարցերի կենտրոն» հասարակական կազմակերպության ներկայացուցիչների համար ԱԳՆ-ում տեղի ունեցավ Քիմիական զենքի կոնվենցիայի իրագործմանը նվիրված աշխատաժողովի նիստ:
Աշխատաժողովը կազմակերպվել էր Քիմիական զենքի արգելման կազմակերպության գործադիր քարտուղարության հետ համատեղ: Նիստին զեկույցներով հանդես եկան Հաագայից ժամանած երեք պաշտոնատարները:
Աշխատաժողովի բացման իր խոսքում ԱԳՆ Սպառազինությունների վերահսկման եւ միջազգային անվտանգության վարչության պետ Սամվել Մկրտչյանն ընդգծեց Կոնվենցիայի անվերապահ իրականացման կարևորությունը` իսպառ վերացնելու զանգվածային ոչնչացման զենքի տեսակներից մեկը: Նա նշեց, որ 1997թ. ի վեր, երբ ուժի մեջ մտավ ՔԶԿ-ն (ՀՀ-ն ստորագրել եւ վավերացրել է համապատասխանաբար 1993 եւ 1995թթ.) հայկական կողմը հանձնառու է եղել դրա դրույթների կատարմանը` պարբերաբար տրամադրելով անհրաժեշտ տեղեկատվություն, իրականացնելով համապատասխան օրենսդրական փոփոխություններ եւ ստեղծելով վերահսկման միջգերատեսչական կառույց:
Քիմիական զենքի արգելման կազմակերպության ներկայացուցիչներն աշխատաժողովի առաջին օրվա ընթացքում ներկայացրեցին զեկույցներ` նվիրված ՔԶԿ պատմությանը, Կոնվենցիայի իրականացման կարգավիճակին, նրա հիմնադրույթներին եւ նպատակներին:
Աշխատանքները կշարունակվեն նաեւ սեպտեմբերի 23-ին, որի ընթացքում անդրադարձ կլինի հավաստագրման, միջազգային համագործակցության եւ աջակցության ծրագրերի խնդիրներին:
