Թուրքիայի արտգործնախարար Ֆիդանը հայտարարել է, որ Անկարան ու Բաղդադը ստորագրել են ահաբեկության դեմ պայքարի եւ անվտանգության ոլորտում գործակցության հուշագիր: համաձայնագիրը ստորագրել են պաշտպանության նախարարները, իսկ Ֆիդանը հայտարարել է, որ ակնկալում են գործակցությունը հասցնել ավելի բարձր մակարդակի: Թուրքիայի եւ Իրաքի այս համաձայնագիրն իհարկե ունի մի քանի մոտիվ, որոնց թվում անշուշտ պետք է դիտարկել ընթացիկ տարվա ապրիլին Թուրքիայի նախագահ Էրդողանի Իրաք կատարած այցի ընթացքոււմ ստորագրված համաձայնագիրը դեպի Եվրոպա առեւտրային երթուղի ձեւավորելու վերաբերյալ:
Ապրիլին Էրդողանը 13 տարվա ընթացքում առաջին անգամ այցելել էր Իրաք, որտեղ ստորագրվեց Իրաքը Եվրոպային կապող տրանսպորտային երթուղի ձեւավորելու մասին քառակողմ համաձայնագիր՝ Թուրքիա, Իրաք, Կատար, Արաբական Էմիրություններ: Թուրքիան խոստացավ դրա համար հատկացնել 1,2 միլիարդ դոլար, սակայն դա իհարկե ծրագրի շատ փոքր մասն է, իսկ հիմնական դոնոր դիտվում են Կատարն ու Արաբական Միացյալ Էմիրությունները: Թուրքիայի եւ Իրաքի միջեւ անվտանգության համաձայնագիրը թերեւս այդ երթուղու հարցում Թուրքիայի հիմնական ներդրումն է:
Այլ կերպ ասած, փող չունեցող Էրդողանը խոստանում է ապահովել երթուղու անվտանգությունը, այդ կերպ միեւնույն ժամանակ ձգտելով բարձրացնել իր դերը ռեգիոնում, դառնալով այսպես ասած Հարավային առեւտրային միջանցքի հիմնական խաղացողներից, դերակատարներից մեկը: Անկարան այդ կերպ կփորձի լինել թե Միջին միջանցքի խաղում, թե Հարավային միջանցքի, ձգտելով փոխլրացնել իր դերակատարումները: Իրաք-Եվրոպա երթուղին իհարկե ինքնին ընդամենը լինելու է ավելի երկար նախագծի մաս, միտված Կենտրոնական Ասիայից եւ հեռավոր Արեւելքից դեպի Եվրոպա ճանապարհների համար պայքարին:
Այդ երթուղին մրցակցային է լինելու թե Չինաստանի, թե Հնդկաստանի, թե Իրանի համար: Այստեղ էական է այն, թե դրա հանդեպ ինչպիսի դիրքորոշում կունենան ԱՄՆ ու Եվրոպան: Զուգահեռ, Իրաքի հարցում իր ակտիվությամբ Անկարան փորձում է եւս մեկ ուղղությամբ արգելափակել Փարիզի ակտիվությունը: 2022 թվականին Իրաքի ուղղությամբ ակտիվ քայլեր փորձեց անել Ֆրանսիայի նախագահ Մակրոնը, որը նաեւ միակ եվրոպացի, ընդհանրապես արեւմտյան միակ երկրի առաջնորդն էր, որ օգոստոսին մասնակցեց Իրաքի մայրաքաղաքում կազմակերպված ռեգիոնալ անվտանգության թեմայով միջազգային համաժողովին, որին տարբեր մակարդակներով մասնակցեցին մերձավորարեւելյան եւ ծոցի ռեգիոնի բոլոր առանցքային երկրները:
Էրդողանը Կովկասում ձգտելով արգելափակել Ֆրանսիայի ակտիվությունն Ադրբեջանի միջոցով, հարավային ուղղությամբ ինքն է կատարում այդ աշխատանքը: Դա կդառնա՞ Ֆրանսիայի, Իրանի ու Հնդկաստանի համար խթան, որպեսզի ակտիվացնեն աշխատանքը Պարսից ծոց-Սեւ ծով երթուղու կազմավորման ուղղությամբ, որը պետք է անցնի Հայաստանով ու Վրաստանով:
