2011 թ. մայիս-հունիս ամիսների ընթացքում ինֆորմացիայի ազատության կենտրոնի կողմից Հայաստանի տեղեկատվություն տնօրինող 50 մարմնի ուղարկվել է 250 հարցում, որոնցից 173-ը՝ գրավոր` փոստային առաքմամբ, 37-ը՝ էլեկտրոնային տարբերակով և 40-ը ներկայացվել է բանավոր` հեռախոսազանգերի միջոցով:
Յուրաքանչյուր մարմնի ուղարկվել է տեղեկություն ստանալու 5 հարցում:
250 հարցումների 56 տոկոսին տրվել է լիարժեք պատասխան, անպատասխան են մնացել հարցումների 30.4 տոկոսը, այն դեպքում, երբ մերժումների ընդհանուր թիվը եղել է ընդամենը 7-ը, որից միայն մեկն է եղել օրինական: Մնացած դեպքերում պետական մարմինները նախընտրել են ոչ թե գրավոր մերժել, այլ ընդհանրապես թողնել անպատասխան:
Հարցումների 1.6 տոկոսին տրվել է թերի պատասխան, 2.4 տոկոսը անհիմն մերժվել է, 5.6 տոկոսը չի ընդունվել:
Տեղեկատվություն տնօրինող 50 մարմնից միայն Օշականի գյուղապետարանն է, որն իրեն ուղարկված 4 գրավոր և 1 բանավոր հարցմանը տվել է լիարժեք և օրենքի սահմաններում հստակ պատասխաններ: Այգեձորի և Ծաղիկ գյուղի գյուղապետարանները բացասական արդյունք են ցույց տվել գյուղապետարանների շարքում:
ԻԱԿ ներկայացուցիչները փաստեցին, որ պատասխանի տրամադրման ժամկետի առումով վատագույն արդյունքը ցույց է տվել Ազգային ժողովը, որը իրավաբանի հարցմանը պատասխանել է ավելի քան մեկ ամիս ուշացումով, իսկ պատասխան գրությունը բաղկացած է եղել ընդամենը երկու տողից:
Անհիմն և արտառոց պատասխանի հեղինակ է ՀՀ պետական եկամուտների կոմիտեն, որը մերժել էր տեղեկատվություն տրամադրել՝ պատճառաբանելով, թե ՀՀ կառավարության կողմից սահմանված չէ տեղեկատվությունների գրանցման, դասակարգման և պահպանման կարգը, որը սահմանված է «Տեղեկատվության ազատության մասին» ՀՀ օրենքով:
Գերատեսչությունների շարքում տեղեկատվության տրամադրման առումով դրական ցուցանիշ են գրանցել կրթության և գիտության և արդարադատության նախարարությունները, նրանք ցույց են տվել լավագույն արդյունք, բացասական արդյունք ցույց է տվել Ազգային ժողովը:
Մարզպետարաններից դրական արդյունք են ցույց տվել Սյունիքի, Շիրակի, Լոռու և Կոտայքի մարզպետարանները: Բացասական է Վայոց Ձորի մարզպետարանը:
Քաղաքապետարաններից լավագույնը Ստեփանավանի քաղաքապետարանն է, բացասական՝ Գյումրիի և Իջևանի քաղաքապետարանները:
ԻԱԿ ներկայացուցիչները փաստեցին, որ տեղեկատվության ազատության առումով իրավիճակը բարելավվել է 2004 թ. համեմատությամբ, մերժումները երկու անգամ կրճատվել են, սակայն դեռևս խնդիրներ կան:
