Մոսկվան պատրաստ է օգնել երկխոսություն զարգացնել Թբիլիսսիի, Ցխինվալիի եւ Սուխումի միջեւ, հայտարարել է ՌԴ ԱԳՆ խոսնակ Մարիա Զախարովան: 16 տարի առաջ աայս օրերին Վրաստանն ու Ռուսաստանը պատերազմի մեջ էին: Հնգօրյա պատերազմի 16-րդ տարելիցին եւ դրա ռեգիոնալ համատեքստին անդրադարձա նախօրեին, արձանագրելով նաեւ, որ 16 տարի անց ըստ էության ունենք զգալիորեն «գլխիվայր», գրեթե տրամագծորեն հակառակ իրավիճակ: Զախարովայի հայտարարությունը ընդամենը վկայություններից մեկն է:
Ոչ պակաս ուշագրավ հայտարարություն է արել Վրաստանի վարչապետ Իրակլի Կոբախիձեն, որն ասել է, որ Վրաստանը պետք է քննի 2008 թվականի պատերազմի հանգամանքները: Ըստ նրա, իրավակազմակերպական ձեւը կարող է լինել տարբեր՝ դիմել դատախազությանը, կամ Սահմանադրական դատարան, կամ ստեղծել խորհրդարանական ժամանակավոր հանձնաժողով: Բայց գլխավորը, ըստ Կոբախիձեւի, «2008 թվականի հանցագործությունը, որ իրականացրել են նախկին նախագահ Միխայիլ Սահակաշվիլին եւ նրա առաջնորդած ուժը, հետաքննվի մինչեւ վերջ»: Վրաստանի կառավարող ուժի համար սա իհարկե նաեւ ներքաղաքական հարց է:
Աշնանը Վրաստանում սպասվում է խորհրդարանի ընտրություն, ինչը վճռորոշ է Թբիլիսիի համար իհարկե ոչ միայն ներքին, այլ նաեւ արտաքին հարցերի եւ օրակարգի իմաստով: Այդ ընտրությանը հնարավոր է Վրաստանում զանգվածային ակցիաների վերսկսում, ընդ որում Արեւմուտքի աջակցությամբ, որը դժգոհ է Վրաստանի ներկայիս կառավարության քաղաքականությունից եւ համարում է, որ այդ քաղաքականությունը համահունչ է Ռուսաստանի շահին: Վրաստանի կառավարող կուսակցությունը հայտարարում է, որ վարում է Վրաստանի շահից բխող քաղաքականություն եւ չի ուզում երկիրը դարձնել երկրորդ Ուկրաինա:
2008 թվականի պատերազմի քննության հարցը Վրացական երազանքը կարող է ծառայեցնել նախընտրական պայքարում մրցակիցների դեմ մարտավարությանը: Իսկ կարո՞ղ է «քննությունը» վերածվել նաեւ անմիջականորեն արեւմտյան խաղացողների դեմ գործողության, որի միջոցով Թբիլիսին կարող է նաեւ ձեռնմուխ լինել ավելի լայն գործընթացի, քան պարզապես նախընտրական պայքարն է: Մասնավորապես, 2008 թվականի պատերազմի հետաքննության գործընթացի միջոցով հասարակական դաշտ բերել օրակարգ, բովանդակություն, որը պարունակելով պատերազմին առնչվող «բացահայտումներ» Արեւմուտքի առնչությամբ, առնվազն փորձել հող նախապատրաստել այն երկխոսության թեմայով, որին նպաստելու Ռուսաստանի պատրաստակամության մասին էլ հայտարարել է Զախարովան:
