Թուրքական Cumhuriyet-ի մեկնաբանի գնահատմամբ՝ Միացյալ Նահանգները նպատակադրված է Թուրքիան գժտեցնել Չինաստանի հետ: Նա գրեթե բառացի կրկնել է Regnum-ի տեսակետը, որ Վրաստանի հետ ԱՄՆ հարաբերությունների սառնությունը ոչ մի կապ չունի ժողովրդավարության եւ մարդու իրավունքների կամ «օտարեկրյա գործակալների» մասին օրենքի ընդունման հետ, այլ պայմանավորված է վրաց-չինական համագործակցությունից Վաշինգտոնի խոր անհանգստությամբ:
Թուրք հեղինակը մանրամասն վերլուծել է Կենտրոնական Ասիա-Ադրբեջան-Հայաստան-Թուրքիա-Եվրոպա հաղորդակցության ամերիկյան ծրագիրը եւ հանգել հետեւության, որ Միացյալ Նահանգներն այն ներկայացնում է, որպեսզի «կիսի» Չինաստանի «Մեկ գոտի՝ մեկ ճանապարհ» նախագիծը: Նրա հայացքով՝ դա նշանակում է «խզել թուրք-չինական համագործակցությունը»:
Այստեղ, կարծես, գործ ունենք տրամաբանական հակասության հետ: Եթե գործարկվում է «միջին միջանցքի» հարավային՝ Հայաստանի տարածքով անցնող երթուղին, եւ Թուրքիան Կենտրոնական Ասիա ելքի երկրորդ հնարավորությունն է ստանում, ապա Միացյալ Նահանգներն ինչպե՞ս են խոչընդոտելու թուրք-չինական համագործակցությանը: Վաշինգտոնը հնարավորություն ունի՞, որ արգելի այդ երթուղով չինական ապրանքների առաքումը:
Խնդիրն, ամենայն հավանականությամբ, նրանում է, որ ամերիկյան նախաձեռնությունը ենթադրում է «միջին միջանցքի» հարավային երթուղու՝ Հայաստանի տարածքով անցնող հատվածի նկատմամբ հայկական իրավազորություն, ինչին Անկարան եւ Բաքուն դեմ են: Թուրք մեկնաբանը համարում է, որ Միացյալ Նահանգները խնդիր ունի «սեպվել Ռուսաստան-Թուրքիա-Իրան տարածաշրջանային ազդեցության գոտի եւ աշխարհաքաղաքական երկրորդ ճակատ բացել»:
Ավելին, երեւի, քննարկում են Թուրքիայի արտաքին գործերի, պաշտպանության նախարարությունում, Անվտանգության խորհրդում եւ Ազգային հետախուզության ծառայությունում: Տեղեկատվա-քարոզչական տիրույթում, մինչդեռ, Անկարան ցուցադրում է Ռուսաստանի հետ սառնություն, անգամ՝ հակասություններ:
Տակտիկական խնդիրներում, գուցե, տարաձայնություններ կան, բացառված չէ, որ դրանք նոր դրսեւորումներ ունենան: Բայց սկզբունքային առումով Ռուսաստանը եւ Թուրքիան հասկանում են, որ Հարավային Կովկասի վերաբերյալ աշխարհաքաղաքական նշանակության որոշում կարող են ընդունել միայն նրանք:
Այդ առումով ի՞նչ հեռանկար ունեն հայ-թուրքական բանակցությունները։ Մանավանդ որ հատուկ ներկայացուցիչների հանդիպումից հետո Թուրքիան եւս մեկ անգամ պնդեց, որ Հայաստանի հետ սահմանի բացումը հնարավոր կլինի միայն հայ-ադրբեջանական կարգավորումից հետո։
Մերձավոր Արեւելքում «պատերազմից հինգ րոպե պակաս» իրավիճակ է։ Օգոստոսի 5-ին ՌԴ ԱԽ քարտուղար Շոյգուն մեկնել է Իրան, հաջորդ օրը նրան ընդունել է Ադրբեջանի նախագահ Իլհամ Ալիեւը։ Շոյգուն Թեհրանից Ալիեւին ուղե՞րձ է տարել, թե Իրանի բարձրաստիճան պաշտոնյաների հետ բանակցություններից հետո Մոսկվա-Բաքու «ժամացույցներ ճշտելու» անհրաժեշտությու՞ն է առաջացել։
Թուրքիան եւ Ադրբեջանը նույն մակարդակի խորհրդատվություններ առ այս պահը չեն իրականացրել։ Ալիեւ-Շոյգու բանակցություններից հետո Բաքու-Անկարա շփում կլինի՞։
