Ադրբեջանական ANS PRESS-ի փոխանցմամբ՝ Ադրբեջանում ԵՄ ներկայացուցչության ղեկավար Ռոլանդ Կոբիան մասնակցել է Բաքվում տեղի ունեցած Gas Infrastructure World Caspian 2011 միջազգային երրորդ համաժողովին։
Համաժողովի ժամանակ Կոբիան հայտարարել է, որ «Անդրկասպյան» գազամուղը վերաբերում է միայն Թուրքմենստանին, Ադրբեջանին ու ԵՄ-ին. «Այդ նախագիծը վերաբերում է միայն երեք կողմի, և ուրիշ ոչ ոքի (Ռուսաստան և Իրան) դա չպետք է անհանգստացնի։ Ես ընդունում եմ այդ երկրների մտահոգությունները, սակայն մենք անում ենք հնարավոր ամեն ինչ բնապահպանական նորմերի պահպանման համար։
Բոլոր երկրները պետք է համոզված լինեն դրանում։ Եթե կյանքի է կոչվել «Հյուսիսային հոսք» գազամուղը, ապա ինչո՞ւ չի կարելի կառուցել «Անդրկասպյան» գազամուղը»։ Վերջինս շատ կարևոր է Թուրքմենստանի, Ադրբեջանի և ԵՄ համար»։
Հիշեցնենք, որ զգալի քանակությամբ գազային պաշարներով օժտված Ռուսաստանն ու Իրանը դեմ են Կասպից ծովի հատակով ամեն տիպի խողովակաշարերի անցկացմանը՝ նախքան Կասպիցի իրավական կարգավիճակ (ծով կամ լիճ) ստանալու հարցի լուծումը։
Ի դեպ, Թուրքմենստանի գազային պաշարների արտահանման համար նախատեսված «Անդրկասպյան» գազատարի կառուցման գաղափարը հղացել է ԱՄՆ-ը՝ 1996 թվականին։ Այն թուրքմենական գազը Կասպիցի հատակով հասցնելու է մինչև Ադրբեջան, որտեղից էլ Nabucco գազատարով՝ Եվրոպա։